Ng’eyo Nyasaye e Yo Maber Nyalo Konyi Nade?

Chop kae, wasenono weche mosekonyowa yudo dwoko mar penjoni: Be Ing’eyo Nyasaye e Yo Maber? Waseneno e Muma ni Nyasaye nyinge Jehova, kendo hera e kite maduong’. Bende, waseneno gik mosetimo kod mobiro timo mondo okel ne dhano ber. Kata obedo ni nitie gik mang’eny momedore ma wanyalo puonjore e wi Nyasaye, samoro inyalo wuoro ka be ng’eyo Nyasaye e yo maber nyalo konyi.

Jehova osingonwa ni ‘ka wadware, to wanayude.’ (1 Weche mag Ndalo 28:9) Parie thuolo makende ma ibiro bedogo kaka imedo timo kinda mondo ing’e Nyasaye. Ibiro bedo osiepne! (Zaburi 25:14, Luo, 1976) Bedo osiep Nyasaye nyalo konyi nade?

Ibedo gi mor madier. Muma luongo Jehova ni: “Nyasaye mamor.” (1 Timotheo 1:11) Bedo osiep Nyasaye kendo luwo kaka otayi biro miyo ibed gi mor madier. Mor ma kamano biro miyo pachi obed mopie, chunyi obed mokue, kendo dendi odhi maber. (Zaburi 33:12) Bende, ibiro dak e ngima maber, ibiro bedo gi timbe mabeyo, kendo ibiro siko ka in gi osiepe mabeyo. Gikone ibiro yie gi weche ma jandik-zaburi nowacho niya: ‘Sudo machiegni gi Nyasaye kelona ber.’​—Zaburi 73:28.

Jehova miyi rit makende. Jehova singo ne joge kama: ‘Nang’adni rieko ka wang’a neni.’ (Zaburi 32:8) Wechego miyo wabedo gadier ni Jehova ong’eyo moro ka moro kuom jotichne, odewogi, kendo omiyogi gik ma gichando. (Zaburi 139:1, 2) Ka iseloso osiep motegno e kindi gi Jehova, obiro miyi rit makende kinde duto.

Ibedo gi geno ma jaber. Mopogore gi konyi ng’eyo kaka inyalo dak e ngima ma mor kendo maber gie sani, Jehova Nyasaye yawoni thuolo mar yudo ngima ma jaber e kinde mabiro. (Isaiah 48:17, 18) Muma wacho kama: “Ma e ngima ma nyaka chieng’, ni ging’eyi in Nyasaye makende mar adier kod jal ma ne ioro, Yesu Kristo.” (Johana 17:3) E kinde matekgi, geno ma Nyasaye miyowa nyalo siro ngimawa e yo motegno mana kaka nanga siro meli.​—Jo-Hibrania 6:19.

Wasewuoyo mana e wi weche machuok ma nyalo konyi mondo ing’e Nyasaye e yo maber kendo ibed osiepne. Pod nitie mamoko mathoth monego ing’e. Omiyo, bed thuolo wuoyo gi Janeno mar Jehova moro amora mondo omed konyi. Kata, inyalo donjo e websaitwa mar jw.org/luo mondo iyud weche momedore.