Sandug Penjo

◼ Ere kaka wanyalo konyo jopuonjre mag Muma mondo owinjre ne batiso kendo bedo jopuonjre Yesu Kristo?

Yo maberie moloyo mar timo kamano en kuom (1) tayo puonjruok mar Muma madhi nyime kendo ma nigi dongruok, (2) jiwogi mondo gidhi e chokruoge abich ma itimoga juma ka juma maok gibare, kendo chiwo paro e chokruogego, kae to (3) mapiyo bang’ ka japuonjre osewinjore bedo jalendo kaluwore gi Ndiko, konye kendo tiege mondo oriw lwedo tij lendo.

Yesu Kristo nochiko jolupne mondo gitim ji obed jopuonjrene, gibatisgi, kendo puonjogi mondo gimak chikene duto. Chikno pod tiyo nyaka e kindegi, mana kaka weche maluwogi lero: “Kendo neuru, an kodu ndalo duto nyaka giko mar ndalo.”​—Math. 28:19, 20.

Japuonjre en ng’at ma yie gi puonj ma ng’at machielo omiye kendo olando puonjgo. Omiyo, jogo duto ma ibatiso nyaka ng’e adiera mag Muma, kendo ngimagi onego onyis maler ni giwinjo tiend chike makare mag Jehova. E wi mano, kaka jopuonjre Yesu Kristo, giyie gi riwruok mar oganda Jehova manie piny kod loch Yesu kokalo kuom “jatichno mogen, kendo mariek.” (Math. 24:45-47; Tich 1:8) Nikech ging’eyo ni tij lendo onego otim mapiyo, giriwore gi oganda Jehova mondo giti tich ma Yesu nochakono kendo chiko jolupne mondo odhi nyime timo. (Luka 8:1; Math. 24:14) Batiso mar pi en gima nyiso ayanga ni gisechiwore ne Jehova Nyasaye gi chunygi duto.​—Pim gi Zaburi 40:8.

Onego wang’e ni wakonyo jopuonjre mag Muma mondo gibed jopuonjre Yesu Kristo to ok jopuonjrewa wawegi. Ka dipo ni nitie gimoro ma nyalo monowa konyo japuonjre Muma timo dongruok mondo obed japuonjre Yesu, kaka chal ma wantiere, thuolo ma wan-go, nyalo marwa, kata gimoro mora machielo, ber ka wawuoyo gi jodong-kanyakla e wi wachno. Ginyalo chiwo paro moko manyalo konyo mondo japuonjreno otim dongruok madwarore, mana kaka jaote Paulo ne owacho e ndiko mar 1 Jo Korintho 3:5-9.

Puonjruok mar Muma gi jopuonjre onego odhi nyime nyaka utiek puonjru buge mag Ang’o ma Muma Puonjo Kuom Adier? kod “Ritreuru e Hera mar Nyasaye,” kata kapo ni japuonjreno obatis kapok utieko puonjru bugego. Kapo ni achiel kuom bugego kata bugego duto ok yudre e dhok ma japuonjreno ong’eyo, to unyalo tiyo gi buk moro amora ma ogo gi riwruok mar oganda Jehova ma lero adiera mag Muma kod chike makare mag Jehova ne dhano.