Chopo Tijwa mar Pinyruoth Kaka Joneno mag Jehova
1 Kaka Joneno mag Jehova wan kod migawo makende moloyo duto e piny. Wachung’ kor ka Jehova e od ng’ado bura mar piny gi polo ma odonjnie jogo duto ma ilamo kaka nyiseche. (Isa. 41:1, 23; 43:12) Mondo omi wachiw dwoko motegno kuom geno marwa, Jehova oseikonwa buge moromo. (1 Pet. 3:15) Buk mar Watch Tower Publications Index en rayaw makonyowa yudo weche ma wadwaro. Ng’eyo kaka ochan moko kuom weche manie bugno biro konyowa medo lony e tiyo kode.
2 Waduto onego wang’e maber wiye maduong’ ma wacho ni “Jehovah.” E bwo wiye maduong’no e Index, be inyalo neno buge mochan malero gimomiyo Jehova oweyo richo mondo omed bedoe kuom kinde? Bende, ibiro yudo wiye matin “Name” e bug Index mar 1930-1985, mar 1986-2000 kod Index ma sani. Buge duto ma osego ma wuoyo kuom nying’ Jehova ochan e bwo wiye matinno.
3 Wiye moro maduong’ kendo maber ahinya mar nono en “Jehovah’s Witnesses.” E bwo wiyeno, ochan kamoro achiel buge duto ma wuoyo kuom Joneno mag Jehova kaka riwruok. Be ing’eyo ni paro marwa kaka Joneno en ang’o e wi wach somo mamalo, baro ringre jo motho e od kano ringre, nego jasigu ma omonji nikech reso ngimani, kata kony mag riwruok mag oganda? Ibiro yudo ka ochan buge ma wuoyo kuom penjogi e bwo wiye matin “attitude toward—.” Ka imedo dhi nyime ibiro yudo ka ochan kaka Joneno mag Jehova mag kindegi osebedoe e pinje mopogore opogore, kod weche ma ji osewacho kuom Joneno mag Jehova e bwo wiye mawacho ni, “Statements by Others.”
4 Sigendini mag ngima jotich Jehova mochung’ motegno jiwowa kendo puonjowa. Ginyalo konyowa keto mise motegno mar kinde mabiro ne nyithindwa kaachiel gi joma wapuonjrego Muma. Ibiro yudo ka ochan sigendinigi kaluwore gi nying’ ng’ato kod nying’ wiye kama siganano yudore e bwo “Life Stories of Jehovah’s Witnesses.” Wiye maluwogi biro nyiso kaka Index nyalo konyowa e kanyakla, e ngima mar joot, koda e tij lendo.
5 Ei Kanyakla. Kotiyo gi Yesu Kristo, ma e Wi kanyakla mar Jokristo, Jehova osemiyo “jatichno mogen,” kata jachung’ ne ot, migawo mar tayo. (Luka 12:42, 43) Chenro moketno osemiyo wayudo buge machiwo weche monego waluw ‘kaka oganda Nyasaye’ e od Nyasaye. (1 Timo. 3:15) Gino maduong’ makonyowa yudo weche ma osego e buge en buk mar Watch Tower Publications Index. Ere kaka onyalo konyi?
6 Be in jaduong’ kanyakla? Nitie wiye madongo ariyo mawuoyo kuom migawo mari: “Elders” kod “Overseers.” E bwo kama wacho ni “Elders” ochan ng’eny buge makonyo e yudo weche kuom kaka inyalo kony ji mopogore opogore ei kanyakla, chiwo paro ma rieyo ng’ato, winjruok e kind jodong-kanyakla, migawo mag jodong-kanyakla, koda mamoko. Weche materowa e buge mawuoyo kuom gigo ma ing’iyo kuom ng’ato mondo omiye migawo mar bedo jaduong’ kanyakla ochan e bwo “Overseers,” nikech mano e wach ma Muma tiyogo ka wuoyo kuom wachni. Bende e bwo “Overseers” nitie migawo moko mag kanyakla kaka, “presiding overseer,” “service overseer,” kod “secretary.” Wiye maduong’ “Congregations” bende biro chiwo weche makonyo.
7 Un ma un jokony-tich ei kanyakla bende un gi tich madwarore ahinya ei kanyakla. Wiye mawacho ni “Ministerial Servants” ochano weche mawuoyo kuom gigo manyiso ni iwinjori bedo gi migawono koda tije monego iti e kanyakla. Bende ibiro yudo weche materi e buge mawuoyo kuom ber mar migawo mag tiyo ne Nyasaye ma in gi thuolo mar chopoe kod kaka inyalo timo dongruok.
8 Konyo Joot. 1 Timotheo 5:4 wuoyo kuom joot ka wacho kama: “Ber gikwong ginyisre ni giluoro Nyasaye kuom jootegi giwegi.” Kuom adier, tim mar chiwruok ne Nyasaye kuom gima watimo ne jo utewa en gima onego wapuonjre. Mondo omi watim kamano dwarore wayud kony kuom Nyasaye, nikech tij rito joot en achiel kuom ting’ ma wan-go kaka Jokristo. Buk mar Watch Tower Publications Index nyalo konyowa yudo weche monego waluw kaluwore kod weche mopogore opogore matimore e ngima joot.
9 Ngima mar joot chakore sama dichwo gi dhako oriw e kend. (Chak. 2:24) Be iparo ahinya wach donjo e kend? E bwo kama wacho ni “Marriage,” ibiro yudo wiye matin “selecting a mate.” Index bende nigi wiye matindo kaka “husband’s role” kod “wife’s role,” giduto gichano buge materowa e weche mabiro konyo jogo madwaro donjo e kend koda jogo ma osedonjo e kend. E wi mano, wiye moko matindo kaka “communication,” “closeness in,” kod “peace” teri e buge ma wuoyo kuom kaka ngima mar kend nyalo bedo maber. Ka chandruok oneno, wiye matin mawacho ni “problems in,” nyalo teri e puonj makonyo e loyo chandruok.
10 Nyithindo gin girkeni ma Jehova ochiwo. (Zab. 127:3) Ere kaka jonyuol nyalo pidho nyithindgi ‘ka girieyogi kendo puonjogi kuom’ Jehova? (Efes. 6:4) Gima duong’ ahinya en puonj ma Jehova chiwo kokalo kuom Wachne kod jatichno mogen. Jonyuol onego ong’e kaka nyithindgi winjo e chunygi kod dwaro mag nyithindgi. Puonj kod paro makonyo nyalo yudore e Index e bwo “Children” kod “Youths.” To nade wach puonjo kata jiwo chik Jehova e chuny nyithindo? Wiye mawacho ni “Child Training,” terowa e puonj moting’o paro kuom weche duto madwarore kuom pidho nyithindo, moriwo nyaka konyogi bedo gi winjruok margi giwegi gi Jehova kaachiel gi bedogi kod dwaro mar ng’eyo adiera. (1 Pet. 2:2) Mondo ngima mar joot obed maber, keto chenro mag puonjruok Muma kaka joot dwarore. (Rapar 6:6-9; Isa. 54:13; Efes. 5:25, 26) Weche ma terowa e buge machiwonwa paro kuom bedo gi puonjruok mar Muma mamor kaka joot inyalo yudi e bwo wiye “Families.” E Index ma sani, wiye matin mawacho ni “Bible study” nigi wiye moko matindo e bwoye kaka “making it effective,” “making it enjoyable,” kod “making it interesting.”
11 E Tij Lendo. Hero Jehova kod dhano wadwa jiwowa mondo waland wach maber mar Pinyruoth. Ka watiyo gi adiera e yo maber, wanyalo ketho “mbaka kod gik moko ma ting’ore malo ma mon kod ng’eyo Nyasaye.” (2 Kor. 10:5) Buk mar Watch Tower Publications Index ogo mondo okonywa e wachni.
12 Wiye maduong’ ma oting’o weche materowa e buge mawuoyo kuom tijwa mar lendo en “Field Ministry.” Onyiso weche duto motudore gi tij lendo kaka, paro ma wan-go kuom tij lendo, weche ma wachakogo ka walendo, loyo akwede ka walendo, kaka wanyalo chiwo buge, dok limbe, kod puonjruok Muma gi ji. Be diher chiwo puonj kuom wach moro ka itiyo gi weche moko ma ne osetimore? Inyalo yudo mana gima idwaro e wi wachno e bwo wiye matin “Experiences.”
13 Be igombo chako puonjri Muma gi ng’ato? Koso in gi japuonjre Muma ma nenore ni ok tim dongruok? E bwo wiye ma wacho ni “Bible Studies” nitie wiye moko matindo kaka “starting,” “assisting,” kod “teaching,” kendo giduto gin gi weche materi e buge mabiro konyi chako kendo dhi nyime gi puonjo jopuonjre Muma mondo otim dongruok.
14 Tiyo tijwa mar Pinyruoth kelonwa mor maduong’. (Joha. 4:34) Buk mar Watch Tower Publications Index nyalo konyi ka itiyo tijni makelo mor koda konyi e yore mamoko duto mag ngima Jakristo.