Sandug Penjo

◼ Ang’o monego oket e bod mar kanyakla e Od Romo?

Bod manie Od Romo oting’o weche mag kanyakla. Ok onego oket gimoro amora e bodno ka jarit matayo kanyakla pok opwodho.

Moko kuom gik ma iketo pile gin kaka: Chenro mar Chokruok mar Tijwa, chenro mar Skul mar Tij Nyasaye, kod joma nigi migawo, twak mag ji duto ma idhi gol, jogo ma omi migepe mag bedo jakom mar Chokruok mar Ji Duto kaachiel gi jasom Mnara wa Mlinzi, jogo manie grube mopogore opogore mag Puonjruok-Buk mar Kanyakla kaachiel gi kuonde ma itimoe chokruogego, barua manyiso tarik ma jarit-alwora biro timo limbe kod weche mamoko e wi limbeno, weche mawuoyo kuom chokruok mar alwora kata mar distrikt mabiro timore, kod chenro mar timo ler mar Od Romo. Seche moko inyiso jodong-kanyakla mondo oket barupe kata weche mamoko e bodno. Ka wach moro mopogore gi mapile nitie, jodong-kanyakla nyalo neno ka en gima owinjore mondo oket e bod mar kanyakla.

Kata obedo ni e achiel kuom chokruoge inyalo tim lendo machuok mar arus madhi timore e Od Romo, lendono ok bi keti e bod. Bende ok en gima owinjore keto weche moting’o lendo manyiso romo mamoko mag mor kata ma ok mag lamo, nikech wechego ok otudore gi tije kanyakla.—Ne The Watchtower April 15, 1984 ite mar 15 kata Mnara wa Mlinzi, Septemba 15, 1984, ite mar 12; Kingdom Ministry, Jun 1975 ite mar 4 kod Mei 1970 ite mar 8 kata Huduma ya Ufalme Yetu Julai 1975, ite mar 4 kod Jun 1970, ite mar 3.

Bodni onego ochanie gik moko e yo manenore maber. Bodno onego obed maduong’ moromo ting’o gik mowachi kae. Weche ma ndalogi osekalo kod mamoko ma kanyakla oseng’eyo wachgi onego ogol ma ok odeko. Ka kanyakla mokalo achiel tiyo gi Od Romo achiel, kanyakla ka kanyakla onego obed gi bod margi kata kama opognegi e bodno ma oketie nying’ kanyakla. Waneno ni jarit matayo kanyakla, kata jalo ma oyiero mondo ong’i bodno kuom kinde ka kinde mondo one ni weche ma oket e bodno gin ma podi itiyogo, gin mowinjore kendo ochan-gi maber.