Sandug Penjo
◼ Be “jatichno mogen, kendo mariek” oyie gi grube matiyo kar kendgi ma Joneno moko oseloso ma romo mondo otim nonro e Ndiko kata chiwo paro mopogore opogore?—Math. 24:45, 47.
Ooyo, ok oyiego. To kata kamano, kuonde mopogore opogore e piny, Joneno manok e riwruok marwa oseloso grube mag timo nonro ma maggi e wi puonj mag Muma. Moko osetimo puonjruok kar kendgi kaka grup e weche mag Hibrania kod Grik ma ne ondik godo Muma mondo gine kabe loko mar Muma mar New World Translation ni kare. Moko timo nonro kuom weche sayans ma otudore gi Muma. Giseloso kuonde mag yudo kata chokoe weche e Intanet (Web sites) kod kuonde tudruok mondo omi gichiwre paro. Bende gisebedo ka gitimo romo kendo goyo buge kama gindikoe weche ma giseyudo kuom nonro margi mondo gimed weche moko e wi puonj ma ichiwo e chokruogewa mag Jokristo kaachiel gi bugewa.
E piny mangima, oganda Jehova yudo puonj mang’eny mag Nyasaye kendo ijiwogi kokalo kuom chokruoge mag kanyakla, mag alwora, koda mag distrikt kaachiel kod buge mag riwruok mar oganda Jehova. Kokalo kuom roho mare maler kendo kotiyo gi Wachne ma en adier, Jehova chiwo gigo madwarore mondo omi jo Nyasaye duto ‘oriwre chuth kuom paro achiel, kod ng’ado bura achiel’ kendo dong’ ka gibet ‘motegno e yie.’ (1 Kor. 1:10; Kolo. 2:6, 7) Kuom adier wamor gi mich mag Jehova mag wachne mochiwo e kindegi mag giko. Kuom mano, “jatichno mogen, kendo mariek” ok oyie gi buk moro amora, chokruoge, kata kuonde Intanet ma ok ochiw kata ok chan kodgi.—Math. 24:45-47.
En gima ber mondo ji oti gi pachgi e riwo lwedo wach maber. Kata kamano, ok onego gombo magwa wawegi ogol pachwa kuom neno gima Yesu Kristo timo kokalo kuom kanyakla mare manie piny sani. E kinde mag Jokristo mokwongo, jaote Paulo ne ochiwo siem kuom donjo e weche majonyo ji kendo maketho seche, kaka “mag anywola, nikech wechego ok rum. Mago kelo mana mbaka, to ok gimi ji ng’eyo cheno mar Nyasaye man kuom yie.” (1 Timo. 1:3-7) Jokristo duto onego otim kinda mar weyo “mbaka mofuwo, gi sigenini mag anywola, dhawo, gi piem kuom weche mag Chik, nikech gionge ohala, kendo gin nono.”—Tito 3:9.
Jogo madwaro timo puonjruok momedore mar Muma kod timo nonro, wajiwogi giti kod Insight on the Scriptures, “Kila Andiko Lenye Pumzi ya Mungu, Lafaa,” kod bugewa mamoko, kaka mawuoyo kuom weche mokor manie buge mag Muma mag Daniel, Isaiah, kod Fweny. Bugegi chiwo weche mang’eny mag puonjruok Muma kendo ma wanyalo paroe matut, manyalo miyo wang’e ‘chuth gi ma Nyasaye dwaro, ka wabedo gi rieko duto gi ng’eyo duto ma roho chiwo. Kamano wawuoth mowinjore ni Ruoth, kendo bet ma long’one chuth e tich mabeyo duto. Wakwayo bende ni wanyag olemo kendo wadongi, ka wamedo ng’eyo Nyasaye.’—Kolo. 1:9, 10.