Gima Nyiso Yie Motegno!
1. Gik ma Yesu ne okoro ni dhi chendo gin mage?
1 Joote ne ochiko itgi ahinya ka ne Yesu wuoyo kuom bedoe mare kod kinde mar giko piny. Gik machendo kaka lwenje, kech, yiengni mag piny, tuoche ne biro timore ni dhano. Bang’e, Yesu nowacho ni jolupne ni ibiro sin kodgi, tergi kar masira, kendo neggi. Jonabi mag miriambo ne dhi sieko kendo lalo ji mang’eny. Hera mar ji mang’eny ne dhi doko mang’ich.
2. Ang’o momiyo en gima ber ahinya neno ni wach maber ilando e pinje duto?
2 Kaluwore gi gik ma ne owuoyoego, nyaka bedi ni joote ne obuok ka bang’e Yesu nowacho ni wach maber mar Pinyruodh Nyasaye ne dhi landre e pinje duto. (Math. 24:3-14) E ndalowagi waneno ranyisi maber ahinya mar kaka wach ma ne okorno chopo. Kata obedo ni wadak e kinde mag chandruok, Joneno mag Jehova timo kinda e lando wach maber. E seche ma hera mar ji mang’eny dok mang’ich, wan to herawa osiko ka medore. Kata obedo ni “e pinje duto” ji sin kodwa, wan to walendo chiegni e piny ka piny.
3. Kwan mage majiwi mineno e ripot mar piny mangima?
3 Mano kaka en gima jipo neno gik ma Joneno mag Jehova ne otimo e higa mokalo mar tijwa monyis e chat manie ite mar 3 nyaka 6! Kuom higni 16 moluwore, ne oti gi seche mokalo bilion achiel e tij lendo kod timo ji jopuonjre. Mano kaka Joneno mag Jehova nyiso yie motegno! Kwan mag painia ne omedre gi pasent mar 5.8, jolendo pasent 3.1 kod jopuonjre Muma pasent 4.4. Ji ma ne obatis ne omedre gi pasent 20.1 moloyo higa mokalo mar tijwa.En gima kelo mor neno kaka chiegni tara abiriyo mag ji nano e tiyo ne Jehova, kendo gitimo kamano e kindegi moloyo kinde moro amora mosebetie! Sama inono chatno, ang’o mineno majiwie moloyo?
4. Chandruok mage ma jal moro ne oloyo ka ne otimo matek mondo obatise?
4 Kata obedo ni kwan-go kelo mor ahinya, kik wiwa wil ni gichung’ ni ji ma ne onyiso yiegi motegno. Ne ane ranyisini. Guillermo ne odongo e piny Bolivia. Ne onyuole e higa mar 1935, kendo ne ochako tiyo e puoth coca (ma ite jomoko tiyogo kaka yath mamero) koja higni ochiko. Nyaka a e tinne, ne onyamo oboke mag coca mondo ogol kuyo ma ne obedogo nikech tich matek. Bang’e nobedo jakong’o kendo jandawa. Ka ne ochako puonjore dwach Jehova, Guillermo ne oweyo ndawa kae to oweyo kong’o. Gima ne tekne ahinya weyo ne en timne mar nyamo oboke mag coca ma ne osebedo kotimo kuom higni mang’eny. Ne olemo kinde duto mi ne oloyo timno. Bang’ weyo timbenego, ne obatise. Owacho kama, “Tinde awinjo kaler kendo amor ahinya.”
5. Gombo manie chunyi en ang’o?
5 Jehova dewo ji gadier. En dwaro mare ni ji duto olok chunygi. (2 Pet. 3:9)Wan bende mano e dwarowa. We uru wabed gi chuny mar timo duto mwanyalo mondo wamed konyo ji ma chunygi ni kare mondo ong’e kendo oher Jehova kaka wan bende watimo.