Wamuko Gik Mogurore Motegno
1 Kuom higini mang’eny, Satan osedino chuny koda paro mag ji mang’eny kotiyo gi puonj mag miriambo kod wuond. Oselando puonj kaka mar didek, chuny ma ok tho, kod sand e mach. Olando puonj maketo kiawa kuom bedoe mar Jachwech kod kiawa kabe Nyasaye e wuon Muma. Sunga mar bedo ja dhoot kata piny moro gin moko kuom gik mageng’o ji kuom neno ler mar adiera. (2 Kor. 4:4) Ere kaka wanyalo muko puonj ma ogurore motegnogo?—2 Kor. 10:4, 5.
2 Kaka Ji Winjo e Chunygi Chikogi: Puonj mag din ma ng’ato osemako kuom higini, kinde mang’eny otudore gi kaka ng’ato winjo e chunye. Moko osemako puonj mag miriambo chakre kinde ma ne pod gin nyithindo. Mondo wakony joma kamago, onego wawuo e yo manyiso luor ne paro ma gichiwo.—1 Pet. 3:15.
3 Wanyalo nyiso joma kamago luor kuom miyogi thulo mar lero yie margi kendo gima omiyo giyie kamano. (Jak. 1:19) Nyalo bedo ni gimako ahinya puonj mar ni chuny ok tho nikech giselalo joma gihero e tho kendo gigombo nenogi kendo. Kata ginyalo rito odiechienge ma itimoe nyasi mag rapar nikech gineno mano kaka thuolo maber mar romo gi joodgi. Winjo paro ma gichiwo biro konyowa ng’eyo gik manie chunygi kendo konyowa dwokogi e yo mowinjore.—Nge. 16:23.
4 Luw Ranyisi mar Yesu: Yesu ne oketonwa ranyisi maber ahinya kane odwoko penjo mar ng’ato ma ne ong’eyo Chik ahinya. Yesu ne ok ochiwo dwoko achiel kachiel, ma kamoro ng’ano ne nyalo kwedo nikech puonj ma ne omako ahinya e chunye. Kar mano, Yesu ne otiyo gi Ndiko, omiye thuolo mar chiwo parone, kendo okonye kotiyo gi ranyisi mondo ochop e paro mowinjore.—Luka 10:25-37.
5 Wach Nyasaye nyalo miyo ji owe keto yie kuom puonj mag din mag miriambo. (Hibr. 4:12) Lero adiera mos mos nyalo jiwo chuny jowinjowa, kendo wanyalo konyo ji kwedo puonj mag miriambo kendo rwako adiera ma nyalo miyo gibed thuolo.—Joha. 8:32.