Be Itiyo gi Bug Kutoa Sababu?
1. Jaote Paulo kod Yesu ne tiyo gi yo mane e puonjo ji?
1 Jaote Paulo ne timo matek e ‘goyo mbaka kuom weche manie Ndiko’ kata poro wach kotiyo gi Ndiko. (Tich 17:2, 3; 18:19) Kuom timo kamano, ne oluwo ranyisi mar Yesu ma kinde mang’eny ne wuoyo kotiyo gi Ndiko, kendo notiyo gi ngero mondo omi jowinjone omak tiend dwaro mar Nyasaye. (Math. 12:1-12) Bug Kutoa Sababu kwa Kutumia Maandiko ogo mondo okonywa timo kamano.
2. Wanyalo tiyo gi Kutoa Sababu nade e iko weche manyalo tiyo maber e chako lendo?
2 Iko Weche Manyalo Tiyo Maber e Chako Lendo: Kutoa Sababu kwa Kutumia Maandiko nigi weche mabeyo mayudore e ite mag 9-15 minyalo tigo e chako lendo ne ji. Puonjruok kendo tiyo gi weche mopogore opogore mag chako lendo, biro konyi lendo kitiyo gi yore mopogore opogore kendo konyi bedo molony e chako wuoyo gi ji, to moloyo ka ilendo e alwora miselendoe nyadinwoya. Inyalo somo weche michakogo lendo achiel kachiel kaka ondikgi e Kutoa Sababu seche ma ilendo kitiyo gi simo kata sama itiyo gi simo mar intercom moket e dho rangeye mag udi ma ok oyiene ng’ato donjo.
3. Gin weche mage mayudore e ite mag 16-24 e Kutoa Sababu manyalo konyowa e lendo?
3 Gima Inyalo Wach ne Joma Temo Geng’o Wach ma Wan-go: Kapok wachako lendo ber ng’eyo ni nitie joma nyalo temo geng’o wach ma wan-go, kendo ber ka wakawo dakika matin mondo wanon-go gima wanyalo wacho negi ka watiyo gi weche mayudore e ite mag 16-21. Be dibed ni weg udi moko gin Jo-Budha, Jo-Hindu, Jo-Yahudi, kata Jo-Islam? Ka en kamano, weche mayudore e ite mag 21-24 biro konyo.
4. Wanyalo tiyo nade gi bug Kutoa Sababu e dwoko penjo, kata sama wawuoyo kuom puonj moro ma ng’ato temo kwedo?
4 Dwoko Penjo: Bug Kutoa Sababu bende nyalo konyowa sama openjwa penjo moro, kata ka wawuoyo kuom puonj moro ma ng’ato temo kwedo. Inyalo wacho ne ng’at ma uwuoyogo ni diher lerone weche moko e wi wach motemo kwedono, kae to igol bugi mar Kutoa Sababu. Nikech weche manie bugni ochan e nyukta maluwore, el wiye miparo ni ibiro yudoe wach midwarono. Kae to ing’i penjo mondiki gi nyukta madongo. Ka ok iyudo wach midwarono mapiyo, to ing’iye e fahirisi mayudore e kalatase mogik mag bugno. Bang’ yudo wachno, somne achiel kachiel kaka ondike e bugno. Kapo ni uwuoyo e wi ndiko moro, inyalo yudo wach midwaro e ite mar 445 e bwo wie mawacho ni, “Maandiko Ambayo Mara Nyingi Hutumiwa Kimakosa.”
5. Gin yore mage mamoko ma inyalo tiyoe gi bug Kutoa Sababu?
5 Tiyo Kode e Yore Mamoko: Jolendo moko okano bugni kuonde ma gitiyoe kata e skul mondo okonygi dwoko penjo kaka, ‘Ang’o momiyo ok irit odiechienge ma itimoe nyasi mag rapar?’ Rowere oseyudo ni weche mayudore e wiye kaka “Uumbaji” kod “Mageuzi” nyalo konyogi sama giiko ripodegi mag skul. Be ichano limo jatuwo moro kata ng’at molalo ng’ate mohero e tho? Weche mayudore e bwo wiye maduong’ “Kitia-Moyo” nyalo konyi e chiwo jip mowinjore kitiyo gi Ndiko e hoyo joma kamago. Bug Kutoa Sababu bende nyalo konyo jogo ma iko twak kata jogo matayo romo mag chano dhi lendo.
6. Ang’o ma wadwaro chopo seche ma walendo?
6 Seche mwalendo dwarowa maduong’ ok en loyo jomoko gi wach, kata nyisogi mana wach moro. Wadwaro poro wach kodgi e yo molony ka watiyo gi Ndiko. Kaka wamedo tiyo gi Kutoa Sababu e yo maber, e kaka wanyiso ni watimo kinda ka waritore e yo ma wapuonjogo.—1 Tim. 4:16.