“Ritreuru e Hera mar Nyasaye”
1. Bug “Ritreuru e Hera mar Nyasaye” ne ogo nikech ang’o?
1 Mano kaka wagombo ahinya chako puonjore buk manyien mar “Ritreuru e Hera mar Nyasaye” e chokruok mar Puonjruok Muma e Kanyakla! Barua ma Bura Maduong’ nondiko ne ng’ato ka ng’ato mohero Jehova tieko gi wechegi: “Wageno gadier ni bugni biro konyi dhi nyime tiyo gi adiera e ngimani mondo omi iritri ‘e hera mar Nyasaye . . . nyaka ichopi e ngima ma nyaka chieng’.’—Juda 21.”
2. Buk manyienni biro konyowa e yore mage mag ngima?
2 Gik Mwageno Puonjore: Ere kaka puonj mag Muma konyo e weche kaka bedo gi osiepe, yore mag yiero mor, nyiso luor ni jogo ma omi loch, timbe mag ng’ato, wach kend, weche mwawacho, kod timbe oganda? Chunywa mar pogo ber gi rach ibiro tiego kaluwore gi chike makare mag Nyasaye ma yudore e Muma. (Zab. 19:7, 8) Kaka wamedo winjo tiend paro ma Jehova nigo, e kaka wabiro bedo gi gombo mar moro chunye kendo luwo chikene e yore duto mag ngima.—Nge. 27:11; 1 Joh. 5:3.
3. Ang’o momiyo onego watim matek mondo wachiw paro kuom weche mipuonjruok juma ka juma?
3 Ikri mar Chiwo Paro: Seche mitimo ikruok ne chokruok, bed gi gombo mar pako Nyasaye e kind chokruok mar ogandane. (Hib. 13:15) Kanyakla duto biro puonjore buk manyienni kanyachiel. Bedo ni wabiro puonjore ka matin ei bugno, biro miyowa thuolo mar timo ikruok maber, mamiyo wabedo gi chir mar chiwo paro kuom gik ma wasepuonjore. Iko paro machuok kendo e yo maber, biro jiwo jomoko mondo omed bedo gi hera kod timbe mabeyo, kendo mano biro miyo wabed gi ilo kendo chiwo paro magero ji. (Hib. 10:24) Bende, mor ma wan-go biro medore sama wachiwo paro manyiso yiewa.
4. Ang’o momiyo dwarore ahinya mondo warit chike Jehova?
4 E otieno mogik ka Yesu ne nie piny, ne owacho ni rito chike Jehova otudore gi ritruok e hera Nyasaye. (Joh. 15:10) Bug “Hera mar Nyasaye,” biro konyowa timo matek moloyo kinde duto, mondo waluw puonj mag Muma e ngimawa mapile kendo ‘waritre e hera mar Nyasaye.’—Juda 21.