Tich Maberie Moloyo
1. En tich mane mar chango ji e yor ranyisi madhi nyime e kindegi?
1 Joma noneno ka ichango jotuwo e kinde Jokristo mokwongo ne mor ahinya. (Luka 5:24-26) E kindegi, wamor ahinya chango ji e yor ranyisi ma en konyogi ng’eyo Jehova. (Fwe. 22:1, 2, 17) Mano mor manade mwayudo seche mwasomo weche mosene kuom kaka Wach Jehova kod roho maler loko kit ngima ji! Kata kamano, wayudo mor ahinya e tijni seche ma watayo puonjruok mar Muma gi ng’at matimo dongruok.
2. Ang’o makelonwa mor seche mwapuonjo ng’ato adiera?
2 Nyasaye nyinge ng’a? Ang’o momiyo oweyo chandruok mondo obedie? Ang’o ma Pinyruodh Nyasaye biro timo ne dhano? Wayudo mor ahinya seche ma wadwoko penjo kaka mago to moloyo ka waneno mor ma japuonjre bedogo seche mopuonjore adiera. (Nge. 15:23; Luka 24:32) Kaka japuonjre medo timo dongruok, onyalo chako tiyo gi nying Jehova, timo lokruok e rwakruokne, weyo timbe mochido kendo chako lendo ne jomoko. Kapo ni otimo dongruok mochiwore kendo obatise, obiro bedo owadwa kendo jatich wadwa. Moro ka moro kuom dongruok ma japuonjre timo kelonwa mor ahinya.—1 Thes. 2:19, 20.
3. Ang’o mwanyalo timo mondo wachak puonjruok mar Muma gi ng’ato?
3 Be Inyalo Konyo e Tijni? Ka diher riwo lwedo tich maberni, kwa Jehova e lamo mondo okonyi yudo ng’at mipuonjorigo Muma kae to itim kaluwore gi kwayoni. (1 Joh. 5:14) Lend kama ji yudore kendo e seche ma giyudore. Chak puonjruok mar Muma kamoro amora ma intie. (Ekl. 11:6) Seche miyudo ng’at morwako adiera, dog mondo iol pi e kodhi mipidhono.—1 Kor. 3:6-9.
4. Ang’o momiyo onego wachak puonjruok mar Muma gi ji maok wadeko?
4 Pod nitie ji mang’eny man gi kech kod riyo mar wach makare. En ng’ano mabiro konyogi ng’eyo Jehova kuom puonjogi adiera mag Muma? (Math. 5:3, 6) Wachiwreuru chuth mondo wakony e tij lendo kod timo jopuonjre kapok keyo ochopo e giko.—Isa. 6:8.