Be Inyalo Lendo Chieng’ Jumapil?

1. Ang’o mwanyalo puonjore kuom gima Paulo gi jowetene notimo ka gin Filipi?

¹ Chieng’ Sabato ema ng’eny Jo-Yahudi ma nodak Filipi ne yueyoe. Paulo kod jomisonari wetene ne olimo dalani kane gin e achiel kuom wuodhegi kaka jomisonari. Dine giher mar yueyo e odiechiengno, onge ng’ama dine oneno kodgi rach nikech noyudo giselendo e odiechienge mamoko. Kata kamano, Paulo gi jowetene nong’eyo ni Jo-Yahudi nochokore oko mar dalano mondo olem, omiyo ne gitiyo gi thuolono mondo gilendnegi. Mano kaka Paulo gi jowetene ne mor ka Ludia norwako wach mi joode duto obatisi! (Tich 16:13-15) Bedoni ji mang’eny yueyo chieng’ Jumapil, donge wanyalo tiyo gi seche moko e odiechiengno mondo walendnegi?

2. Gin pek mage ma jo Jehova oseloyo mondo gilend chieng’ Jumapil maonge ng’at machandogi?

² Pek mag Lendo Chieng’ Jumapil: E higa mar 1927, nojiw jo Jehova mondo oti gi seche moko e tij lendo Jumapil ka Jumapil. Ne ok obudho kapok giromo gi akwede. Ng’enygi nomaki e piny Amerka kiwacho ni giketho chike mag Sabato ma Jumapil, ni gimono ji bet gi kuwe kendo ni giuso maonge barua. Chuny jo Jehova ne ok onyosore. E higini mag 1930, jonenogo nochanore e “grube mag kampen,” ma jolendo mawuok e kanyakla mani machiegni ne lendo e alwora moro. E kinde ma ne imako jolendogo, noyud ka ging’eny ma joloch ne ok nyal makogi duto. Kuom adier, chiwruok mar owetego nomiyo e kindegi wanyalo lendo chieng’ Jumapil maonge ng’at machandowa.

3. Ang’o momiyo chieng’ Jumapil en odiechieng’ maber ahinya lendo?

³ Odiechieng’ Maber Ahinya Lendoe: Ji mang’eny yudore e udi chieng’ Jumapil nikech ok gidhi tich. Ma e odiechieng’ ma gihinyo yueyoe. Jomoko mohero dhi e kanisa nyalo hero wuoyo kuom Nyasaye e odiechiengno. Kapo ni watimo chokruok chieng’ Jumapil, yudo ka warwakore maber kaka wajorwakore ka wadhi e tij lendo, donge nyalo bedo maber ka wachano lendo kapok wadhi e chokruok kata bang’ tieko chokruok? Inyalo ting’o gimoro matin minyalo chamo kapo ni mano owinjore.

4. Ber mane mwanyalo yudo kuom tiyo gi seche moko e lendo chieng’ Jumapil?

⁴ Ka watiyo gi seche moko e tij lendo chieng’ Jumapil, pod wabiro yudo thuolo mar yueyo. Kendo wabiro yueyo ka wan gi chuny mokuwe nikech wasetiyo tich maler mar lendo. (Nge. 19:23) Bende wanyalo yudo mor kuom nwang’o ng’at machalo gi Ludia!