Weche Monego Waket e Paro Sama Walendo ne Jo-Islam
1 Be isegalendo ne Ja-Islam? Ka en kamano, nyaka bed ni isefwenyo ni Jo-Islam wacho ni gin-gi yie motegno kuom Nyasaye. Kata kamano, ok ging’eyo maber gima jonabi mag Jehova nokoro ni ibiro lok piny obed Paradiso. Omiyo, dwaher nyisogi geno majaberno. (1 Tim. 2:3, 4) Weche moler kaegi biro konyowa mondo walend ne Jo-Islam e yo maber moloyo.
2 Jo-Islam oyie kuom Allah, kata Nyasaye, kendo giyie ni Muhammad (Mohammed) en janabi mar Nyasaye. Buk ma gitiyo e lamo iluongo ni Koran, kendo din-gi iluongo ni Islam, ma tiende en “bolruok.” Koran wacho ni miriambo kod lamo kido kata gik mopa en richo kendo ni Nyasaye en achiel to ok Nyadidek. Koran puonjo bende ni chuny ok tho, ni nitie mach misandoe joricho, kendo ni joma beyo biro dhi e paradiso e polo. Jo-Islam oyie ni Muma en Wach Nyasaye, to gineno ni osegweny weche moko e iye. Giwacho ni Koran, mapod yudore e dhok ma nokwong ndikego, to pok ogweny.
3 Wuo Kodgi Mamor, Kik Imwomri, Kendo Ti gi Rieko: Sama ilendo ne Ja-Islam, wuo kode e yor osiep kendo kik imwomri kuome. (Nge. 25:15) Par bende ni Jo-Islam omako yiegi matek ahinya, kendo thoth Jo-Islamgo ipuonjo e yor mako gi wich. Kuom mano, ok ging’iyo gi timo nonro matut e wi weche din kata temo matek mondo ging’e dwach Nyasaye. (Rumi 12:2) Mondo mi wakony Jo-Islam, nyaka wabed joma hore kendo ma tiyo gi rieko.—1 Kor. 9:19-23.
4 Tem kik iti gi weche ma nyalo miyo Jo-Islam opar ni in achiel kuom Jokristo mag miriambo. Nyisgi maler ni in ok ija Katholik kata Protestant, kendo ni ipogori gi jogo mabor. Sama iwuoyo kuom Muma, luonge aluonga ni Bug Nyasaye. To nikech Jo-Islam chwanyore ka onyisgi ni nitie “Wuod Nyasaye,” nyalo bedo maber ka ok waluongo Yesu gi nyingno kata wuoyo kuom nyingno nyaka chop kinde mowinjore. Kata kamano, pod wanyalo wuoyo kuom Yesu ka waluonge mana ni janabi kata jaote. Tem ahinya kik idwokri kodgi. Ka ifwenyo ni igi chako wang’, to weri aweya kodgi mos.
5 Ber wuoyo gi ng’ato achiel kar wuoyo gi ji mang’eny nyadichiel. Kinde mang’eny, nyalo bedo maber ka nyimine ema olendo ne mon to owete olend ne chwo. En adier ni nitie kinde ma nyalo chuno ni owadwa moro olend ne Ja-Islam ma dhako, kata nyaminwa moro olend ne Ja-Islam ma dichwo. Sama mano otimore, ber tiyo gi rieko. Bende, nitie kit rwakruok moko mag joma mon ma Jo-Islam neno ni ok owinjore. Nyiminewa onego oket wachno e paro kinde duto.—1 Kor. 10:31-33.
6 Weche ma Wanyalo Wuoyoe Kodgi: Wuo kuom ber mar Nyasaye kod herane. Kik iwe maok inyisogi ni iyie kuom Nyasaye, ni Nyasaye en achiel to ok Nyadidek, kendo ni ok iyie gi lamo kido. Wuo kuom gik maricho monya e piny kaka lwenje, chayo jomoko nikech kuma giae, kod wuondruok ma nenore ayanga kuom jodin.
7 Brosua mar Mwongozo wa Mungu—Njia Yetu ya Kwenda Paradiso oting’o yore mamoko ma wanyalo tiyogo e chako mbaka gi Jo-Islam. Brosuano olosi mondo olomb Jo-Islam modak e gwenge ma ginyalo yudoe thuolo mar puonjruok Muma.
8 Sama ichiwo brosuano, inyalo wacho kama: “Kawuono atemo matek mondo ago mbaka gi Jo-Islam. Asesomo weche moko mag dinu, omiyo an gadier ni uyie kuom Nyasaye achiel kod jonabi duto. [Rit dwoko.] Daher mondo wago kodi mbaka e wi wach ma janabi moro nokoro chon ahinya manyiso ni pinyni chieng’ moro ibiro loki obed paradiso. Ok asomnie gima janabino nokoro? [Som Isaiah 11:6-9.] Weche ma wasomogi parona weche moko mogol e Koran mayudore e buk matinni.” Dhi e ite mar 9 e brosuano kendo isom weche mondik gi range momorore, malero ni joma tir kata joma kare biro dak e piny. Ka mbakano omore, nonuru paragraf mag 7 nyaka 9 manie ite momanyore gi ma untieno. Wene brosuano kendo ichan mar dok lime.—Yo machielo mar chako mbaka gi Jo-Islam nie Huduma ya Ufalme Yetu ma Februar 1998 ite mar 6, paragraf mar 27.
9 Sama eka ihango nono brosua mar Mwongozo wa Mungu gi Ja-Islam, kik inyise ni gima utimono en puonjruok Muma. Kar mano, nyise ni en mana mbaka. Sama ulung’o brosuano, onego obed ni japuonjreno oikore nono brosua mar Wach Maber kata bug Muma Puonjo. Nitie buge mamoko ma bende olosi mondo okony Jo-Islam, kaka brosua mar Imani ya Kweli—Siri ya Kuwa na Maisha Yenye Furaha, trakt mar Jinsi ya Kuipata Barabara ya Kwenda Kwenye Paradiso, kod buk matin miluongo ni The Time for True Submission to God.
10 Nikech koro wang’eyo gik ma Jo-Islam oyiego kod maok giyiego, nyalo bedo maber ka watiyo gi rieko sama wayalonegi kod sama wayiero buge ma wadwaro miyogi. Jehova biro dhi nyime gwedho kinda ma watimo e konyo ji duto mondo oluong nyinge kendo oresgi.—Tich 2:21.