Luw Ranyisi mar Jonabi —Hosea
1. En penjo mane ma samoro isegapenjori?
1 ‘Anyalo chiwora tiyo ne Jehova e okang’ maromo nade?’ Samoro isegapenjori penjono sama iparo matut kuom gik mabeyo ma Jehova osetimoni koda ng’wono ma osenyisi. (Zab. 103:2-4; 116:12) Janabi Hosea nochiwore mar timo gimoro amora ma Jehova nonyise, kata obedo ni mano ne dwaro ni otim gik ma dine ok otimo e ngimane mapile. Ere kaka wanyalo luwo ranyisi ma Hosea noketonwa?
2. Ere kaka wanyalo luwo ranyisi mar Hosea ka wadwaro ni wanan e tij lendo?
2 Lend Kata e Kinde ma Weche Richo: Ote ma Hosea ne lando ne mulo ahinya ahinya pinyruoth mar dhoudi apar mag Israel, kama lamo maler ne chiegni rumoe chuth. Ruoth Jeroboam mar Ariyo notimo gik maricho e wang’ Jehova, kendo nomedo siro tim mar lamo nyaroya ma Ruoth Jeroboam Mokwongo nochako. (2 Ruo. 14:23, 24) Ruodhi duto ma nolocho bang’ Jeroboam mar Ariyo e pinyruoth mar dhoudi apar mag Israel nodhi nyime siro lamo mar miriambo. Gikone, ne oketh pinyruodhno e higa mar 740 Ka Ndalowa Podi. Kata obedo ni lamo mar miriambo nonya ahinya, Hosea to notimo sinani kotiyo kaka janabi kuom higini madirom 59. Wan bende onego waikre mar chung’ motegno e tij lendo, kata mana e kinde ma chunywa onyosore kata sama waromo gi akwede.—2 Tim. 4:2.
3. Gin gik mage ma Hosea notimo ma konyowa ng’eyo ng’wono mar Jehova?
3 Ng’wono mar Jehova Ema Obedni Gimaduong’: Jehova nochiko Hosea mondo okend “dhako mandhoga” kata ma jaterruok. (Hos. 1:2) Dhakono ne nyinge Gomer. Kata obedo ni Gomer nonyuolo ne Hosea nyathi achiel ma wuoyi, bang’e nonyuolo nyithindo mamoko ariyo gi dichwo machielo. Hosea nomakore chuth gi Jehova, kendo ne oikore weyo ne chiege kethone. Ranyisi ma Hosea noketo nonyiso maler kaka Jehova ne oikore weyo ne Jo-Israel kethogi ka ne giloko chunygi. (Hos. 3:1; Rumi 9:22-26) Wan bende onego waikre keto tenge gombowa wawegi mondo waland ne ji duto ng’wono mar Jehova.—1 Kor. 9:19-23.
4. Gin gik mage ma wanyalo timo mondo wachiwre e tij Jehova e okang’ momedore?
4 Nitie jotich Jehova moko ma noweyo tijegi ma nigi yuto maber mondo giyud thuolo momedore mar lendo. Moko to oseng’ado mar bedo maok gidonjo e kend kata bedo maonge gi nyithindo mondo giti ne Nyasaye e okang’ momedore. Samoro ka waparo gik ma Hosea notimo e ngimane, wanyalo wacho ni, ‘An gik ma Hosea notimogo ohinga.’ Kata kamano, kaka wamedo ng’eyo ng’wono mar Jehova e okang’ malach, kendo geno kuom teko mar rohone, e kaka obiro medo konyowa timo gik ma samoro pok ne waparo ni wanyalo, mana kaka nokonyo Hosea.—Math. 19:26; Fili. 2:13.