Luw Yie Margi
1. Wabiro nono buk mane e Puonjruok Muma e Kanyakla kochakore juma mar Oktoba 19?
1 Wabiro chako nono bug Luw Yie Margi e Puonjruok Muma e Kanyakla e juma machakore Oktoba 19, 2015. Bugno oting’o sigand chwo gi mon 14 manie Muma ma ne nigi yie motegno. Bugno ondik e yo ma konyowa neno gadier gik ma ne otimore ne jogo, kendo kaka ne gitiyo ne Jehova kata obedo ni ne gikalo e pek moko. Bugno bende nyisowa gik mwanyalo puonjore kuom sigendnigo, kendo kaka wanyalo tiyo gi puonjgo e ngimawa.—Hib. 6:12.
2. Ler moko kuom gik ma yudore e i bug Luw Yie Margi.
2 Kaka Ochan Iye : Bugno nigi kama nyiso kinde ma weche miwuoyoe notimoree, kod map ma konyowa ng’eyo kuonde ma jogo nodakie. E wi mano, sula ka sula nigi kama wacho ni “Par Ane Wechegi . . . ,” ma konyowa paro matut kuom sigendnigo kendo tiyo gi weche ma wapuonjore. Bugni bende nigi piche mabeyo mosetimnegi nonro mong’ith ma biro konyowa neno e pachwa joma iwuoyoe e sigendnigo.
3. Wanyalo timo ang’o mondo mondo wayud ber sama wanono bugni?
3 Kaka Bugno Nyalo Konyi: Barua ma Bura Matayo nondikonwa e chak bugno jiwowa kama: “Ket pachi sama isome. Tem ketori e chal ma joma Muma wuoyoego ne nitiere. Tem winjo kaka jogo ne owinjo, tem neno e pachi kaka ne gineno. Ne gima jogo notimo e chal moro kipimo gi gima in to ditimo.” Keto pachwa sama wasomo sigana moro ok nyis ni koro wapar apara kata kuom gik ma Muma ok olero, to en ni waketre e chal mar joma siganano wuoyoe. Timo kamano dwaro thuolo kod paro matut. (Neh. 8:8) Kapo ni sula ma wapuonjore e kanyakla chakore e diere, jal ma tayo onego oti gi nus dakika kata dakika achiel e nwoyo gik ma ne wapuonjore juma mokalo. Kapo ni kama wapuonjore onge gi kama wacho ni “Par Ane Wechegi . . . ,” jal ma tayo onego oik penjo achiel kata ariyo mag nwoyo weche madongo.
4. Ang’o momiyo dwarore ni wapuonjre bug Luw Yie Margi?
4 Wadak e piny ma tiyo gi yore duto mondo ginyoswa kata giketh yiewa. Bugni, kaachiel gi sula mamoko ma pod igoyoga e Ohinga mar Jarito ma wigi wacho ni “Luw Yie Margi” gin mich ma Jehova omiyowa mondo okonywa tego yiewa. (Jak. 1:17) Watemuru matek mondo kik wabare e chokruok mar Puonjruok Muma e Kanyakla, kendo wachiw paro sama wanono bugno kanyachiel!