NGIMAWA KAKA JOKRISTO
Kaka Inyalo Puonjori Muma e Yo Matut
Be diher dhi nyime makori gi Jehova sama iromo gi tem mana kaka Daniel notimo? Daniel nopuonjore Wach Nyasaye e yo matut moriwo nyaka weche mokor ma tiendgi tek. (Dan 9:2) Puonjruok Muma e yo matut nyalo konyi mondo ichung’ motegno e bwo tem. E yo mane? Timo kamano biro konyi mondo imed bedo gi yie motegno ni gik ma Jehova osingo biro timore. (Jos 23:14) Timo kamano bende biro miyo imed hero Nyasaye kendo biro jiwi mondo itim gima kare. (Za 97:10) Kata kamano, inyalo chako puonjori Muma nade? Ne ane paro maluwogi.
Ang’o monego ipuonjri? Puonjruok maber oriwo iko chokruoge mag kanyakla. Somo mar Muma ma juma ka juma biro bedo mamit mana ka ikawo thuolo mar timo nonro e wi weche ma ok ing’eyo tiendgi. E wi mano, jomoko osekawo thuolo mar puonjore mathoth e wi weche ma ne okor e Muma, olembe mopogore opogore mag roho maler, wuodhe mag jaote Paulo ka ne en jamisonari, kata chuech mag Jehova. Samoro inyalo paro penjo moro ma dwokone yudore e Muma, inyalo ndike piny kae to ibiro timone nonro e puonjruokni maluwo.
Inyalo yudo kanye weche monego ipuonjri? Mondo iyud paro moko, ne vidio ma wiye wacho ni Gige Timo Nonro Makonyowa Yudo Mwandu Manie Wach Nyasaye. Mondo ing’e okang’ ma iwinjogo tiend weche manie Muma, tim nonro e wi loje mag piny ma iwuoyo kuomgi kitiyo gi ondiegi e bug Daniel sula mar 7.
Onego ipuonjri kuom thuolo ma romo nade? Puonjruok ma ok ibari biro konyi bedo gi winjruok maber gi Nyasaye. Inyalo chako puonjori kuom thuolo machuok, kae to mos mos inyalo medo seche mipuonjorigo. Puonjruok Wach Nyasaye chalo gi manyo mwandu mopandi, kaka imedo yudogi e kaka imedo manyogi moloyo! (Nge 2:3-6) Ibiro medo bedo gi siso mar somo Wach Nyasaye, kendo ibiro puonjori Muma kinde duto.—1Pe 2:2.
ONDIEGI MA IWUOYO KUOMGI E BUG DANIEL SULA 7 OCHUNG’NE ANG’O?
PENJO MOMEDORE:
Weche manie Daniel 7:8, 24 nochopo nade?
GIMA CHIELO MA INYALO PUONJORI:
Ondiegi ma iwuoyo kuomgi e Fweny sula mar 13 ochung’ne ang’o?