Bed Gadier ni Ibiro Reswa ka Giko Pinyni Ochopo

Machiegnini, horuok ma Jehova horego gi pinyni biro chopo e gikone. Ibiro keth dinde mag miriambo, bang’ mano riwruok mar pinje biro monjo jo Nyasaye, kae to Jehova biro tieko joma richo chuth e lweny mar Har–Magedon. Jokristo rito gi siso kinde ma gik madongogi biro timoree.

En adier ni ok wang’eyo weche duto e wi masira maduong’. Kuom ranyisi, ok wang’eyo ni masirano biro chakore kar ang’o. Ok wang’eyo weche ma josiasa biro tiyogo mondo ginyisgo gimomiyo gimonjo dinde. Ok wang’eyo ni riwruok mar pinje biro monjo jo Nyasaye kuom kinde ma romo nade kata ni monjgino biro riwo timo ang’o. E wi mano, ok wang’eyo yo ma Jehova biro tiyogo sie e tieko joma richo e lweny mar Har-magedon.

Kata kamano, Ndiko miyowa weche duto ma dwarore mondo okonywa wabed gadier kod chir e wi gik ma biro timore kinde mabiro. Kuom ranyisi, wang’eyo ni wadak e giko mar “ndalo mag giko.” (2Ti 3:1) Wang’eyo ni monj mar dinde ibiro “ng’ad machuok” mondo din mar adier kik tieki. (Mat 24:22) Wang’eyo ni Jehova biro reso joge. (2Pe 2:9) Kendo wang’enyo ni Jal ma Jehova oyiero mondo otiek joma richo kendo ochiw rit ne oganda mang’ongo e lweny mar Har-magedon en Jal ma ng’ado bura e yo makare kendo en gi teko.​—Fwe 19:11, 15, 16.

Gik ma biro timore e kinde mabirogo biro miyo ji obed gi luoro. Kata kamano, sama wasomo kendo waparo matut kaka Jehova noreso joge e kinde machon kod gik mosenyisowa ni biro timore e kinde mabiro, wanyalo ‘chung’ tir kendo ting’o wiwa malo,’ ka wan gadier ni resruokwa chiegni.​—Luk 21:26, 28.