Be Inyalo Paro?
Be isebedo ka isomo gasede mag Ohinga mar Jarito ma higani? Ka en kamano, ne ane ka inyalo dwoko penjo ma luwogi:
Gin ber mage ma wayudo ka watiyo gi thuolowa e wuoyo gi Jehova, winje, kendo paro kuome?
Wabiro timo yiero mabeyo, wabiro bedo jopuonj mabeyo, yiewa biro bedo motegno, kendo hera ma waherogo Jehova biro medore.—w22.01, ite mar 30-31.
Ka wapuonjore geno Jehova kod joma otiyogo e tayowa, mano biro konyowa nade?
Ma e sa monego wapuonjre geno Jehova kuom luwo kaka riwruok mar ogandane kod jodongo chikowa. Ka watimo kamano, to e kinde masira maduong’, wabiro luwo kaka ichikowa kata mana sama onyiswa ni watim gik ma pok ne watimoga nyaka nene kendo ma nyalo bedonwa matek timo.—w22.02, ite mar 4-6.
Ang’o ma malaika ne temo wacho ka nowacho ni Jo-Yahudi ne dhi neno “[Gavana] Zerubabel koting’o kabiro mipimogo e lwete”? (Zek. 4:8-10)
Fwenyno nojiwo jo Nyasaye ni kata obedo ni hekalu ma ne gigero ne ok ber kaka machon, pod ne idhi gere ma tieke, kendo ne odhi bedo kaka Jehova ne dwaro.—w22.03, ite mar 16-17.
Ere kaka wanyalo keto “ranyisi maber . . . kuom wuoyo”? (1 Tim. 4:12)
Sama walendo, wawuoyo mang’won kendo wanyiso ji luor. Sama wan e chokruok, wawer gi chunywa duto kendo wachiwo paro nyading’eny. Sama wagoyo mbaka gi jowetewa, wawacho adier, watiyo gi weche ma jiwo jomamoko, kendo ok wawach weche mag ayany.—w22.04, ite mar 6-9.
Ang’o momiyo ondiek achiel miwuoye e Fweny 13:1, 2 nigi kido duto mag ondiegi (pinjeruodhi) ang’wen miwuoye e Daniel sula mar 7?
Ondiek miwuoye e Fweny 13 ok ochung’ mana ne sirkal moro achiel, kuom ranyisi, Rumi. Kar mano, ochung’ ne sirkende duto ma oselocho e wi dhano chakre chon nyaka kawuononi.—w22.05, ite mar 9.
En yo mane ma wanyalo nyisogo ni wan gadier chuth ni Jehova biro ng’ado bura e yo makare?
Sama ng’ato oyanyowa, ochwanyowa, kata okethonwa e yo moro amora, watemo matek mondo kik wabed gi mirima kod sadha, to kar mano, waweyo weche e lwet Jehova. Obiro golo chandruoge duto ma richo osekelo.—w22.06, ite mar 10-11.
Ka okwa owadwa moro mondo olem e chokruok, ang’o monego oket e paro?
Lamo ok onego obed yo michiwogo siem kata mitimogo lendo moro. Ok onego oti gi “weche mang’eny” sama olemo, to ahinya-ahinya sama ichako chokruok. (Mat. 6:7)—w22.07, ite mar 24-25.
“Jo ma notimo gik maricho” ibiro chier nade e “chier mar bura”? (Johana 5:29)
Mano ok nyis ni ibiro ng’adnegi bura marach ka luwore gi gik ma ne gitimo chon. Kar mano, ibiro ng’adnegi bura ka luwore gi gik ma gibiro timo bang’ kosechiergi.—w22.09, ite mar 18.
En jip mane maduong’ ma J. F. Rutherford nochiwo e chokruok maduong’ ma notim Septemba 1922?
E chokruok maduong’ ma notim Cedar Point, Ohio, e piny Amerka, nowacho kama: “Ruoth koro locho! Un e joote mage. Omiyo landuru, landuru, landuru Ruoth kod pinyruodhe!”—w22.10, ite mar 3-5.
Isaya sula mar 30 jiwo yore mage adek ma Nyasaye konyowago mondo wanan e bwo tembe?
Sulano wacho ni Nyasaye konyowa kuom (1) chikonwa ite kendo dwoko lamowa, (2) tayowa, kod (3) miyowa gueth e kindegi kendo e kinde mabiro.—w22.11, ite mar 9.
Ang’o momiyo wanyalo wacho ni weche ma yudore e Zaburi 37:10, 11, 29 nochopo e kinde Jo-Israel machon kendo gibiro chopo e kinde mabiro?
Weche ma Daudi nowacho e Zaburino nyiso maler gueth ma Jo-Israel noyudo e kinde loch Solomon. Yesu nonyiso ni wechego biro chopo e kinde mabiro e Paradiso, kendo notiyo gi kwan matindo 11 e jiwo wachno. (Mat. 5:5; Luka 23:43)—w22.12, ite mar 8-10, 14.