Weche ma nyiso luor chalo gi simiti ma biro riwou e kend maru
NE JOMA OKENDORE
3 Chiwo Luor
TIEND WACHNO
Dichwo gi dhako ma omiyore luor dewore gadier kata sama gichwanyore. Buk moro miluongo ni Ten Lessons to Transform Your Marriage wacho kama: “Ng’at ma miyo jaode luor ok bi dwaro ni pache e ma nyaka luw. Kar mano, obiro wuoyo gi nyawadgi e wi gima chwanyogino. Ng’ato ka ng’ato chiko ne nyawadgi ite sama ochiwo paro, kendo obiro wuoyo e wi wach ma nyalo konyogi giduto.”
PUONJ MA MUMA CHIWO: “Hera . . . ok omany mana gik ma kelone ber owuon.”—1 Jo-Korintho 13:4, 5.
“Mondo anyis ni amiyo jaoda luor, nyaka agene kendo ok onego atimne gimoro amora ma nyalo chwanye kata ma nyalo ketho kendwa.”—Micah.
GIMOMIYO EN GIMA DUONG’
Ka joma okendore ok omiyore luor, weche ma giwacho e kindgi nyalo bedo mag ajara kendo ma chwoyo chuny, ma gin weche ma jolony wacho ni ka joma okendore osiko ka tiyogo, to mano nyalo nyiso ni kendgino nyalo kethore chuth.
“Ka ijawacho ne jaodi weche ma chwoyo chuny kata angera moko maricho, mano nyalo nyoso chunye kendo ok obi geni; mano nyalo miyo kend maru okethre.”—Brian.
GIMA INYALO TIMO
NONRI ANE
Tem ane nono gik ma isebet ka itimo ne jaodi kod ma isebet ka iwachone kuom juma chiel. Kae to ipenjri ane penjogi:
‘Nalwero jaoda ma rom nade, to napwoye ma rom nade?’
‘Gin yore mage sie ma nanyisogo ni amiyo jaoda luor?’
WUOURU E WI PENJOGI
Gin weche mage ma ka uwacho kata utimo to nyalo miyo ng’ato owinj ni omiye luor?
Gin weche mage ma ka uwacho kata utimo to nyalo miyo ng’ato owinj ni ochaye?
TEM TIMO KAMA
Ndik ane piny gik mineno ni kotimni to ibiro winjo ni omiyi luor. Kae to jaodi bende otim kamano. Mi jaodi listni to en bende omiyi mare, kae to utem ane timo dongruok e wi weche ma nyawadu ondiko.
Ndik kido ma jaodi nigo ma mori kae to inyise gimomiyo kidogo mori matek.
“Anyiso ni amiyo jaoda luor kuom timo gik ma nyiso ni agene kendo ma miyo obedo mamor. Seche moko ok ochuno ni itim gik moko malich ahinya e ka inyis ni imiyo jaodi luor. Timo ne jaodi kata mana gik matindo tindo biro nyiso ni imiye luor gadier.”—Megan.
Wach maduong’ ok en ni ineno ni imiyo nyawadu luor, to en ka nyawadu be neno ni imiye luor.
PUONJ MA MUMA CHIWO: “Rwakuru hera ma kecho jomamoko, ng’wono, bolruok, muolo, kod horuok.”—Jo-Kolosai 3:12.