12 Bedo gi Gik Midwaro Chopo

TIEND WACHNO

Bedo gi gimoro sie midwaro chopo ber moloyo weche migombo agomba. Sama idwaro chopo gimoro sie, nyaka ibed gi chenro maber, iikri timo lokruok, kendo iti matek ma ok igen ni gik moko biro timore nyalhodia.

Inyalo bedo gi gik ma diher chopo bang’ kinde machuok (ma kawo odiechienge moko kata jumbe), gik minyalo chopo bang’ kinde ma bet ogwaro matin (ma kawo dweche), kod gik minyalo chopo bang’ kinde malach (ma kawo higa achiel kata mokalo mano). Timo gik moko matin tin, gikone biro konyi chopo gima duong’ midwaro.

GIMOMIYO EN GIMA DUONG’

Sama ichopo gima nichano timo, mano miyo ibedo gi chir, itego osiep manie kindi gi jomamoko, kendo ibedo mamor.

Bedo gi chir: Sama ichopo gik matindo tindo ma nidwaro, mano biro miyi chir mar timo gik madongo. Bende, mano biro miyi chir mar nyagruok gi tembe minyalo romogo pile ka pile, kuom ranyisi, aola mag mbese.

Tego osiep: Ji ohero mako osiep gi joma nigi gik ma gidwaro chopo e ngima, kendo ma timo kinda mondo gichop gigo. E wi mano, mako osiep gi ng’ama gombo timo gik ma in be ihero, biro miyo osiep manie kindu omed gurore motegno.

Bedo mamor: Sama ichopo gima nidwaro, mano miyo ibedo mamor.

“Ahero bedo gi gik ma daher timo. Mano miyo abedo modich kendo abedo gi siso mar chopo gik ma asechano. Sama atimo kamano, mano moraga matek kendo ajawachoga ni, ‘Thoo! Atieke.’”​—Christopher.

PUONJ MA MUMA CHIWO: “Ng’at ma ng’iyo yamo ok nochwo kodhi, kendo ng’at ma ng’iyo boche polo ok noka cham.”​—Eklesiastes 11:4.

GIMA INYALO TIMO

Kaw okenge ma luwogi mondo okonyi chopo chenro miseketo.

Yier gik ma digomb chopo. Ndik piny gik midwaro chopo, kichako gi mokwongo, kidhi e mar ariyo, mar adek, kamano-kamano nyaka itiekgi.

Ndik plan. E moro ka moro kuom weche midwaro chopo, ndik . . .

• kinde monego itiekgie.

• okenge mibiro luwo.

• pek moko minyalo romogo kod kaka inyalo loyo pekgo.

Tim kaka isechano. Kik irit nyaka ing’e weche duto e wi gima ichano timo e ka ichak time. Penjri kama: ‘En ang’o ma anyalo chakogo mondo okonya chopo gima adwaro?’ Kae to ichak timo gino. Tem nono dongruok misetimo e okang’ ka okang’ migoyo.

PUONJ MA MUMA CHIWO: “Chenro mag jakinda kelo ohala.”​—Ngeche 21:5.