Ng’at ma Jachir

KAKA ji ne medore e piny, e kaka ng’enygi ne timo gik maricho kaka Kain. Kata kamano, ng’at achiel kuomgi ne opogore. En ng’atni, iluonge ni Enok. Enok ne en ng’at ma jachir. Ji ma ne odak e kindeno ne timo gik maricho ahinya. Kata kamano, Enok ne odhi nyime mana gi tiyo ne Nyasaye.

Bende ing’eyo gimomiyo jogo ma ne odak kindeno ne timo gik maricho ahinya? Par ane wachni, en ng’ano ma ne omiyo Adam gi Hawa oketho chik Nyasaye ma gichamo olemo ma Nyasaye ne owacho ni kik gicham? Ee, ne en malaika marach. Muma luonge ni Satan. Kendo otemo miyo ji duto obed jo maricho.

Chieng’ moro Jehova Nyasaye ne omiyo Enok ote mar nyiso ji gimoro ma ne ok gidwar winjo. Ne en kama: ‘Nyasaye chieng’ moro biro ketho ji duto maricho.’ Nyaka bed ni ji ne ok mor gi wachno. Nyalo kata bedo ni, ne gitemo nego Enok. Kuom mano, ne dwarore mondo Enok obed ng’at ma jachir e nyiso ji gima Nyasaye ne dhi timo.

Nyasaye ne ok oweyo Enok mondo odag kuom ndalo mang’eny e kind joma ne richogi. Enok ne odak ma obedo ja higini 365 kende. Ang’o momiyo wawacho ni “higini 365 kende”? Nikech ji e ndalono ne gin joma roteke maloyo ndalowa, kendo ne gidak kuom kinde mang’eny. Donge, Methusela wuod Enok ne odak ma obedo ja higini 969!

Ka Enok ne osetho, ji ne omedo bedo maricho. Muma wacho ni ‘paro duto mag dhano ne rach pile’ kendo ‘tim maricho mag dhano ne opong’o piny.’

Be ing’eyo gimomiyo ne nitie chandruok mang’eny e piny e kindego? En nikech Satan ne nigi yo manyien mar mako ji otim gik maricho. Wabiro puonjore wachni e somo maluwo mae.