SIGANA MAR 14

BE INYALO neno gima Ibrahim timo kae? En gi pala, kendo chalo ka gima odhi nego wuode. Onyalo dwaro timo kamano nikech ang’o? Mokwongo, we wane kaka Ibrahim kod Sara ne oyudo nyathigi ma wuowi.

Ng’e ni Nyasaye ne osingorenegi ni gibiro yudo nyathi ma wuowi. Mano ne chalo gima ok nyalre nikech Ibrahim gi Sara ne oti ahinya. Kata kamano, Ibrahim ne nigi yie ni Nyasaye ne nyalo timo hono. Kuom mano, ang’o ma ne otimore?

Bang’ ka Nyasaye ne osesingore, higa achiel mangima ne okalo. Ibrahim kane ja higini 100 to Sara ja higini 90, ne ginyuolo wuowi ma nyinge Isaka. Nyasaye ne ochopo singruokne!

Kata kamano, Isaka kane osebedo maduong’, Jehova ne otemo yie mar Ibrahim. Ne oluonge ni: ‘Ibrahim Ibrahim!’ To Ibrahim ne odwoke ni: ‘An ka!’ Kendo Nyasaye ne owachone: ‘Kaw wuodi koro, wuodi ma miderma, Isaka, kendo idhi e wi got moro ma nanyisi, kendo ichiwe kanyo kaka misango.’

Wachno ne lit ne Ibrahim nikech ne ohero wuode ahinya. To ng’e ni Nyasaye ne osingo ni nyithind Ibrahim nodag e piny Kanaan. Mano ne nyalo timore nade ka Isaka otho? Ibrahim ok ne ong’eyo, to kata kamano ne otimo kaka Nyasaye ne dwaro.

Kane ochopo e wi got, Ibrahim ne otweyo Isaka ma okete e kendo mar misango ma ne ogero. Bang’e, ne ogolo pala mondo oneggo wuode. E seche ma ne otimoe mano, malaika mar Nyasaye ne oluongo ni: ‘Ibrahim, Ibrahim!’ To Ibrahim ne odwoke ni ‘An ka!’

Nyasaye ne owachone niya: ‘Kik iket lweti kuom wuowino, kata kik itimne gimoro. Nikech koro ang’eyo ni iluoro Nyasaye, kaneno ni ok itama e wuodi, en wuodi ma miderma.’

Mano yie maduong’ miwuoro ma Ibrahim ne nigo kuom Nyasaye! Ne en gi yie ni onge gima ne nyalo tamo Jehova, kendo ni Jehova ne nyalo chiero Isaka. Kata kamano, ne ok en dwaro mar Nyasaye mondo Ibrahim oneg Isaka. Kuom mano, Nyasaye ne omiyo rombo moro omoko e bunge moko machiegni, kendo ne onyiso Ibrahim mondo ochiwe kaka misango kar chiwo wuode.