Chi Lut ne Ong’iyo Chien

LUT gi joode ne odak kod Ibrahim e piny Kanaan. Chieng’ moro, Ibrahim ne owacho ni Lut niya: ‘Piny mawan-go kae, ok oromo jamni magwa. Asayi, ia kuoma. Ka idhi konchiel, anadhi komachielo.’

Lut ne ong’iyo pinyno. Ne oneno pap maber ma ne nitie pi kod lum maber gi jamni. Mani ne en piny Jordan. Kuom mano, Lut ne odar gi joode koda gi jamni. Gikone, ne giloso dalagi e boma mar Sodom.

Jo-Sodom ne gin joma richo ahinya. Mano ne wang’o i Lut ahinya nikech ne en ng’at maber. Nyasaye bende ne ok mor. Gikone, Nyasaye ne ooro malaike ariyo mondo onyis Lut ni obiro ketho Sodom koda dala ma ne chiegni kode mar Gomora nikech richogi.

Malaika nowacho ne Lut ni: ‘Tim piyo! Kaw chiegi, kod nyigi ariyo mondo ua ka.’ Lut kod chiege ne galore, omiyo malaikego ne omako lwetegi ma ogologi oko mar dalano. Bang’e, achiel kuom malaike nowacho: ‘Ret uru ures ngimau! Kik ung’i chien. Ringuru piyo e got, mondo kik negu.’

Lut gi nyige ne owinjo ma giringo gi a Sodom. Ne ok gichung’ kata matin, kata ng’iyo chien. Kata kamano, chi Lut ne ok owinjo wach. Kane gisedhi mabor matin gi Sodom, chi Lut ne ochung’ ma ong’iyo chien. Eka ne olokore mobedo kidi mar chumbi. Bende inyalo nene e pichano?

Wanyalo yudo puonj maber kaluwore gi gima ne otimoreni. Onyiso ni Nyasaye reso jogo mawinjo wachne, to jogo ma ok winj wachne biro lalo ngimagi.