Rude ma ne Kitgi Opogore

YAWUOWI ariyo mantie kae opogore adier, donge? Bende ing’eyo nyingegi? Wuowi ma jadwarno en Esau, to wuowi marito rombeno en Jakobo.

Esau gi Jakobo ne gin rude ma yawuot Isaka gi Rebeka. Isaka wuon-gi ne ohero Esau ahinya nikech ne en jadwar maber, kendo ne onyalo kelo chiemo e odgi mondo gicham. Kata kamano, Rebeka ne ohero Jakobo moloyo, nikech ne en wuowi mamuol ma ohero kuwe.

Ibrahim ma kwargi ne pod ngima, kendo mano nyalo miyo wawach ni Jakobo ne ohero winjo ka kwar mare wuoyo kuom Jehova. Gikone, Ibrahim ne otho ka jahigini 175, to rudego ne gin jo higni 15.

Kane Esau jahigini 40, ne okendo mon ariyo ma wuok e piny Kanaan. Mano ne ok omoro Isaka gi Rebeka, nikech mon-go ne ok lam Jehova.

Odiechieng’ moro achiel, gimoro ne otimore ma ne omiyo Esau obedo gi mirima gi owadgi ma Jakobo. Ne ochopo kinde ma Isaka ne dwaro chiwo gweth ni wuode maduong’. To nikech Esau ne duong’ ni Jakobo, Esau ema ne onego oyud gwethni. Kata kamano, mani ne onwang’o ka Esau ne oseuso gwethno ni Jakobo. Bende ka ne onyuol yawuowi ariyogi, Nyasaye ne osewacho ni Jakobo ne dhi nwango’ gwethno. Kendo mano ema ne otimore. Isaka ne omiyo Jakobo wuode gwethno.

Bang’e, Esau kane owinjo wachno iye ne owang’ gi Jakobo. Iye ne owang’ ma nowacho ni obiro nego Jakobo. Rebeka kane owinjo wachno, kibaji ne ogoye. Kuom mano, ne onyiso Isaka chwore niya: ‘Abiro jok gi ngimana ka Jakobo bende okendo nyako moa Kanaan.’

Kuom mano, Isaka noluongo Jakobo wuode ma onyise ni: ‘Kik ikend nyako kuom nyi Kanaan. Dhi Haran e od Bethuel ma wuon minu. Kanyo ikend nyako kuom nyi Laban ma wuode.’

Jakobo ne owinjo wach wuon mare, kendo mapiyo nono ne ochako wuoth maborno mar dhi Haran kama wedene ne odakie.