Jood Jakobo Bedo Mang’eny

NE ANE nyithindo mang’enygi. Gin yawuot Jakobo 12. Ne en kata kod nyithindo ma nyiri. Bende ing’eyo nying nyathi moro amora kuom nyithindogo? We wapuonjre moko kuom nyingegi.

Lea ne onyuolo Reuben, Simeon, Lawi, to kod Juda. Rahel ne okuyo ahinya kane oneno ni ok oyud nyithindo. Kuom mano, ne okawo jatichne ma Bilha, ma omiyo Jakobo, kendo Bilha ne onyuolo yawuowi ariyo ma nyingegi gin Dan kod Naftali. Lea bende ne okawo jatichne Zilpa ma omiyo Jakobo, kendo Zilpa ne onyuolo Gad gi Asher. Mogik, Lea ne oyudo yawuowi moko ariyo, Isakar kod Zebulun.

Gikone, Rahel bende ne oyudo nyathi. Ne omiye nying mar Josef. Wabiro puonjore mang’eny kuom Josef bang’e, nikech ne obedo jatelo maduong’ ahinya. Magi e yawuowi 11 ma ne onyuol ni Jakobo, e kinde ma ne odak gi Laban wuon Rahel.

Jakobo bende ne nigi nyithindo ma nyiri, kata kamano Muma miyowa mana nying nyako achiel kuomgi. Ne iluonge ni Dina.

Kinde ne ochopo ma Jakobo ne dwaro weyo Laban mondo omi odog Kanaan. Kuom mano, ne ochoko joode duto kod kwethne mag rombe, gi dhok, ma ochako wuoth ma ne tere mabor.

Bang’ ka Jakobo gi joode ne osedak Kanaan kuom kinde machuok, Rahel ne onyuolo wuowi machielo. Ne onyuolo wuowini ka gin e wuoth. Rahel ne oyudo chandruok ahinya e seche mag nyuol, ma gikone ne otho. Kata kamano, nyathi matin ma wuowino to ne ngima. Jakobo ne omiye nying mar Benjamin.

Wadwaro ni mondo wamak e wiwa nyinge yawuot Jakobo 12, nikech oganda mar Israel duto ne oa kuomgi. Kuom adier, dhoudi 12 mag Israel iluongo gi nying yawuot Jakobo 10 kod nying yawuot Josef ariyo. Isaka ne odak kuom higini mang’eny kane osenyuol yawuowigi duto, to nyaka bedni ne omor ahinya bedo gi nyikwayo mang’eny. Kata kamano, we wane gima ne otimore ni nyakware ma Dina.