Otwe Josef e Jela

YOSEF en jahigini 17 kende kane otere Misri. Ng’at miluongo ni Potifar ema ong’iewe kuno. Potifar tiyo ni ruodh Misri ma iluongo ni Farao.

Josef tiyo matek ni jatende, Potifar. Kuom mano, ka Josef bedo ng’ama duong’, Potifar kete jarit mochung’ ne gik moko duto e ode. To kare, ang’o momiyo Josef ni e jela kae? Mani otimore nikech chi Potifar.

Josef odongo ma obedo dichwo ma jachia ahinya. Kuom mano, chi Potifar dwaro ni mondo onind kode. Kata kamano, Josef ong’eyo ni mano ok en tim makare, omiyo ok obi yie. Chi Potifar iye owang’ ahinya. Kuom mano, chwore ka oduogo e ot, owachone miriambo ni: ‘Josef, ng’at marachno ne temo nindo koda!’ Potifar kawo wach chiege kaka adier, kendo iye wang’ ahinya kod Josef. Kuom mano, orwako Josef ei jela.

Bang’ kinde matin, jatend jela neno ni Josef en ng’at maber. Kuom mano, okete kaka jatend mabuse duto. Bang’e, Farao iye wang’ kod jalosne divai gi jatedne makate, kendo orwakogi e jela. Otieno moro, ji ariyogi leko lek makende ng’ato ka ng’ato, to kata kamano, ok ging’eyo tiend lekgigo. Odiechieng’ maluwe, Josef nyisogi ni: ‘Pimnauru lek-ugo.’ Ka gipimone, Josef nyisogi tiend lekgo ka otiyo gi kony moa kuom Nyasaye.

Josef nyiso jalos divai ni: ‘Bang’ ndalo adek ibiro gonyi ia e jela, to ibiro bedo jalos divai mar Farao kendo.’ Kuom mano, Josef medo wachone ni: ‘Chieng’ ma nogonyi, inyis Farao wachna, kendo konya mondo ogonya aa kae.’ Kata kamano, Josef nyiso jated makate ni: ‘Bang’ ndalo adek, Farao biro miyo ong’ad wiyi oko.’

Kane ndalo adek okalo, gik moko timore mana kaka Josef ne owacho. Farao miyo ing’ado wi jated makate. To jalos divai igonyo, kendo ochako tiyo ni ruoth. Kata kamano, jalos divai wiye owil kod Josef! Ok onyis Farao wach Josef, omiyo Josef odong’ ei jela.