Ayub En Ng’ama Kare e Wang’ Nyasaye

BE INENO lit nikech ng’at matuwoni? Nyinge en Ayub, to dhako mantie kodeno en chiege. Be ding’e gima otemo wacho ni Ayub? ‘Yany Nyasaye mondo itho.’ We mondo wane gimomiyo ne onyalo wuoyo kamano, koda gima omiyo Ayub ne yudo chandruok ahinya.

Ayub ne en ng’at makare e wang’ Jehova kendo ne orito chikene. Ne odak e piny Uz, machiegni gi Kanaan. Jehova ne ohero Ayub ahinya, to kata kamano nitie ng’at ma ne osin kode. Be ing’eyo ni ne en ng’a?

Ne en Satan kendo Jachien. Ng’e ni Satan e malaika ma mon gi Jehova. Nikech ne omiyo Adam gi Hawa oketho chik Jehova, ne oparo ni onyalo timo kamano ne ng’ato ang’ata bende. Be ne otimo kamano? Ooyo. Par ane jogo duto ma ne ochung’ motegno ma wasepuonjore kuomgi. Adi kuomgi ma inyalo paro nyingegi?

Bang’ tho Jakobo gi Josef e piny Misri, Ayub kende e ng’at ma ne ni kare ahinya e wang’ Jehova e piny mangima. Jehova ne dwaro mondo Satan ong’e ni ne ok onyal miyo ji duto otim richo, omiyo ne owachone kama: ‘Ne ane Ayub. Ne kaka en ng’at ma tir e wang’a.’

Satan to ne owacho niya, ‘Ayub en ng’at makare mana nikech igwedhe kod mwandu mang’eny. To ka imaye gigi, eka obiro yanyi.’

Kuom mano, Jehova ne owachone niya: ‘Ne, en e lweti. Maye gigo. Tim ne Ayub gik maricho duto midwaro. Wabiro neno ka be noyanya. Kata kamano, iwe ngimane.’

Mokwongo, Satan ne okelo ji mokwalo dhog Ayub gi ngamia mage, kendo rombene bende ne onegi. Bang’e, Satan ne onego yawuote gi nyige apar e yamo maduong’. Kendo ne okelo ni Ayub tuwo malichni. Ayub ne chandore ahinya. Mano e momiyo chiege ne owachone kama: ‘Yany Nyasaye mondo itho.’ Kata kamano, Ayub ne otamore timo kamano. Ji adek ma ne wuondore ni osiepene, bende ne owachone ni nyaka bed ni ne otimo gimoro marach. Ayub to ne ochung’ motegno.

Mani ne omiyo Jehova obedo mamor ahinya, kendo bang’e ne ogwedho Ayub mana kaka inyalo neno e picha. Ne ochango Ayub kuom tuwo ma ne en-go. Ayub ne oyudo nyithindo moko 10 mabeyo, kendo ne oyudo nyadiriyo dhok, rombe kod ngamia maloyo kaka ne en-go chon.

Be ibiro bedo ng’at makare kinde duto e wang’ Jehova kaka Ayub? Ka itimo kamano, Nyasaye biro gwedhi in bende. Kendo ibiro yudo thuolo mar dak e piny, e kinde ma piny duto nolos ma bed maber kaka puoth Eden.