Ruoth Marach Locho e Misri

JOMA ineno kae, chuno ji gi tich. Ne ane ng’at ma chwado achiel kuom jotichgo gi del! Joma tiyogi gin anyuola mag Jakobo, kendo iluongogi ni Jo-Israel. To joma chunogi gi tich gin Jo-Misri. Jo-Israel osebedo wasumbini mag Jo-Misri. Ere kaka mani ne otimore?

Kuom higini mang’eny, anyuola Jakobo ma koro ne ng’eny, ne odak gi kuwe e piny Misri. Josef ma ne en jalup Farao ruodh Misri e kom duong’, ne oritogi maber. Bang’e, Josef ne otho. Farao machielo ma ne ok ohero Jo-Israel, ema koro ne obedo ruoth e piny Misri.

Kuom mano, Farao marachni ne otimo Jo-Israel wasumbini. Kendo ne oketonegi jotelo ma ne kwiny. Ne gichuno Jo-Israel mondo oti matek e gero mier ni Farao. Kata kamano, kwan Jo-Israel ne medore ameda. Bang’ kinde moko, Jo-Misri ne obedo gi luoro ni Jo-Israel ne dhi bedo mang’eny ma bed gi teko maloyogi.

Be ing’eyo gima ne Farao otimo? Ne owuoyo gi mon ma ne konyo mond Jo-Israel nyuol ka owachonigi niya: ‘Nyaka uneg nyithindo duto ma yawuowi ma ibiro nyuolo.’ Kata kamano, mon-gi ne kitgi beyo, kendo ne ok ginyal nego nyithindogo.

Kuom mano, Farao ne ogolo chik machielo ni joge duto niya: ‘Kawuru nyithind Jo-Israel duto ma yawuowi mondo unegi. Nyithindo ma nyiri kende ema weuru mondo obed mangima.’ Donge mano ne en chik malich? We mondo wane kaka ne ores achiel kuom nyithindo ma yawuowigi.