Musa gi Harun Odhi Neno Farao

ANE Musa odok Misri, ne onyiso Harun owadgi duto kuom honnigo. Kendo kane Musa gi Harun onyiso Jo-Israel honnigo, ne giyie giduto ni Jehova ne nikodgi.

Bang’e, Musa gi Harun ne odhi neno Farao. Ne ginyise niya: ‘Jehova Nyasach Israel owacho kama, “We mondo joga odhi kuom ndalo adek, mondo gidhi gilama e thim.”’ To Farao ne odwokogi niya: ‘Aonge gi yie kuom Jehova. Kendo ok abi gonyo Jo-Israel mondo odhi.’

Mirima ne omako Farao, nikech ji ne dwaro thuolo mar weyo tich mondo gidhi gilam Jehova. Kuom mano, ne ochunogi tiyo matek maloyo pile. Jo-Israel ne osin gi Musa nikech ne giparo ni ne isandogi nikech en, kendo wachni ne ok mor Musa. To Jehova ne onyise ni mano kik chand chunye. Jehova ne owachone ni ‘Anami Farao owe joga mondo odhi.’

Musa gi Harun ne odhi neno Farao kendo. Wang’ni to ne gitimo hono. Harun ne obolo ludhe piny ma ludhe ne olokore thuol maduong’. Kata kamano, jo rieko mag Farao bende ne obolo ludhegi piny ma olokore thuonde. To ne ane! Thuond Harun mwonyo thuonde mag jo riekogo. To ema podi Farao ne otamore weyo Jo-Israel mondo odhi.

Kuom mano, kinde ne ochopo ma koro Jehova ne dwaro miyo Farao puonj moro. Bende ing’eyo kaka ne otimo mano? Ne okelo chandruoge madongo kata masiche apar e piny Misri.

Masichegi kane timore, Farao ne luongo Musa kendo ne owachone ni: ‘Chung ane masichegi, to anawe Jo-Israel mondo odhi.’ To kane ochung masira, Farao ne loko pache kinde ka kinde. Ne ok odwar weyo ji mondo odhi. To gikone, bang’ masira mar apar, Farao ne ogonyo Jo-Israel.

Bende ing’eyo masiche apargo duto e yo maler? El kalatas mondo wapuonjore kuomgi.