Hema mar Lamo

E ING’EYO ni gima oger kani en ang’o? En hema makende ma ilame Jehova. Iluonge bende ni tabanakel. Ji ne otieko gere higa achiel, bang’ wuok Misri. Be ing’eyo ni ng’ama ne dwaro ni mondo ogere?

Jehova ema ne owacho mondo ogere. Musa kane podi ni ewi Got Sinai, Jehova ne onyise kaka onego ger tabanakelno. Ne owacho ni mondo ogere e yo ma nyalo miyo ogonye mayot. Mano ne nyalo miyo oting’re e yo mayot kitere komachielo, kendo kigere bende. Kuom mano, kinde duto ma Jo-Israel ne dar kowuok kamoro kendo ka gidhi komachielo e thim, ne gidar kod hemano.

Ka ing’iyo ei ot matin manie bath hemano, inyalo neno sanduk. Ma iluongo ni sandug singruok. Ne ochwene kido molos gi dhahabu mar malaike kata jokerubi ariyo, achiel koni, to achiel kocha. Nyasaye ne kendo ochako ondiko Chike moko Apar e kite ariyo mopadore, nikech Musa ne obaro kite mokwongo. Kendo kitegi ne okan ei sandug singruok. Agulu matin moting’o manna, bende ne iketo ei sandugno. Be podi inyalo paro gima manna en?

Harun owadgi Musa ema Jehova yiero kaka jadolo maduong’. Otelone ji e lamo Jehova. Yawuote bende gin jodolo.

Koro ng’i ane ot maduong’ ei hema. Oduong’ nyadiriyo maloyo ot kama oketie sandug singruok. Be ineno iro kawuok e wi sandug singruokno? Ma e altar kama jodolo wang’oe gik moko mang’we ng’ar miluongo ni ubani. Kendo nitie siro mar taya ma nigi teche abiriyo. Bende, nitie koda mesa kanyo. E mesano ne ikete makate 12.

Oko mar tabanakel, nitie bakul kata besen maduong’ ma opong’ gi pi. Jodolo tiyo kode e lwokruok. Bende nitie kendo maduong’ mar misango. Kanyo e kama iwang’e le moseyang’, kaka chiwo ne Jehova. Hemano ni e dier kambi, kendo Jo-Israel odak e hembegi e alwora mare.