Jakuo e Israel

NE ANE gima jali yiko e hema mare! Nanga maber, dhahabu kod fedha moko. Ne okawogi e dala mar Jeriko. To ang’o ma ne onego tim kod gik ma ne oyud Jeriko? Bende inyalo paro?

Ne onego oketh gigo, to dhahabu gi fedha ne onego ochiw e kar keno e tabanakel mar Jehova. Kuom mano, jogi oketho chik Nyasaye. Gikwalo gir Nyasaye. Nying ng’atno en Akan, to joma nikodego gin joode. We wane gima timore.

Bang’ Akan kwalo gigi, Joshua oro jomoko mondo odhi ogo lweny gi dala mar Ai. Kata kamano, iloyogi e lweny. Jomoko kuomgi inego, to jo modong’ ringo. Joshua okuyo ahinya. Onindo auma, kendo olamo Jehova niya: ‘Ang’o momiyo iweyo gini mondo otimrenwa?’

Jehova dwoko ni: ‘Chungi! Jo-Israel oseketho. Gisekawo moko kuom gik ma ne onego okethi kata chiwo ne tabanakel mar Jehova. Ne gikwalo nanga maber, kendo ne gipande. Ok abi gwedhou nyaka uketh nangano kod ng’at ma ne okwaleno.’ Jehova wacho ni obiro nyiso Joshua ng’at marachno.

Kuom mano, Joshua koro choko ji duto, kendo Jehova fwenyo Akan kaka jaketho. Akan wacho ni: ‘Aseketho. Ne aneno nanga maber, dhahabu kod fedha moko. Ne agombogi ahinya, omiyo ne akawogi. Ibiro yudo ka akunyogi ei hemba.’

Kane oyud gigo, kendo kane okelgi ir Joshua, Joshua ne onyiso Akan ni: ‘Ang’o momiyo isekelonwa masira? Jehova koro nokelni masira!’ Kuom mano ji duto chielo Akan gi joode duto gi kite nyaka githo. Donge mano puonjowa ni ok onego wakaw gik ma ok magwa?

Bang’e, Jo-Israel dhi e lweny gi Jo-Ai kendo. Wang’ni to Jehova konyo joge, kendo gilocho e lwenyno.