Onyuol Yesu e Kund Dhok

BE ING’EYO ni nyathi matin-ni en ng’a? Ee, en Yesu. Eka oa nyuole e kund dhok. Kul en kama jamni ninde. Mariam opielo Yesu e sanduk ma iketonie dhok, punda koda jamni mamoko chiemo. Kata kamano, ang’o momiyo Mariam koda Josef ni kaachiel gi jamni? Kani ok en kama onego onyuolie nyathi, koso?

Ee, ok en. Kata kamano, gimomiyo gin kae en ni: Jatend Rumi, miluongo ni Kaisar Augusto ne ogolo chik mawacho ni ng’ato ka ng’ato nyaka dogi kama ne onyuole mondo nyinge ondiki e buk. Josef ne onyuol e Bethlehem kae. Kata kamano, kane gichopo gi Mariam, ne onge ot ma ne ni thuolo. Kuom mano, ne nyaka gibi kaendi kama jamni nitie. Kendo e odiechieng’no, ema Mariam nonyuoloe Yesu! Kata kamano, kaka inyalo neno, Yesu ngima.

Be inyalo neno jokwath kabiro neno Yesu? Ne gin e kwath gotieno ka girito rombe, kendo ler norieny molworogi. Ne en malaika! Jokwath ne luoro omako ahinya. Kata kamano, malaika ne owacho ni: ‘Kik uluor; akelonu weche mabeyo. Kawuono e dala mar Bethlehem, onyuol Kristo ma en Ruoth. Nores ji! Ubiro yude ka oume gi lewni, kendo onindo e sanduk mar miyo jamni chiemo.’ Apoya nono, malaike mang’eny ne obiro ma ochako pako Nyasaye. Kuom mano, gie sano, jokwathgi ne otimo piyo ma gidwaro Yesu, to koro giseyude.

Be ing’eyo gimomiyo Yesu en ng’at makende? Be ing’eyo ni en ng’a kuom adier? Par ni e sigana mokwongo ei bugni, ne wawuoyo kuom Wuod Nyasaye mokwongo. Wuowini ne otiyo gi Jehova e loso polo gi piny koda gik moko duto modong’. Mano e kaka Yesu en!

Ee, Jehova ne ogolo ngima wuode e polo ma okete ei Mariam. Nyathi ne ochako dongo e iye mana kaka nyithindo moko dongo ei minegi. Kata kamano, nyathini ne en Wuod Nyasaye. Gikone, Yesu ne onyuol Bethlehem e kund dhok ma inenoni. Koro be inyalo neno gimomiyo malaike ne mor ahinya e wacho ne ji ni, Yesu osenyuol?