Yesu Ei Hekalu ka Podi En Rawera

NE ANE wuowi ma rawerano ka wuoyo gi jodongogi. Gin jopuonj ei hekalu mar Nyasaye ma ni Jerusalem. To wuowino en Yesu. Osedongo makoro oduong’ matin. Koro en jahigini apar gariyo.

Jopuonjgo wuoro ahinya ni Yesu ong’eyo e yo malach wach Nyasaye kod gik ma ondiki e Muma. Kata kamano, Josef gi Mariam ok nikanyo nang’o? Gin kanye? We wane.

Higa ka higa Josef kelo joode Jerusalem e nyasi makende miluongo ni Pasaka. Wuok Nazareth nyaka Jerusalem en wuoth mabor. Onge ng’ama nigi mtoka, kendo onge geche reru. Ne gionge kodgi ndalogo. Ng’eny ji wuotho, kendo kawogi odiechienge madirom adek mondo gichop Jerusalem.

Gie sani, Josef ni kod nyithindo mang’eny. Kuom mano, nitie owete koda nyimine Yesu matindo ma onego Josef rit. Koro e higani, Josef kod Mariam ochano wuoth mar dok Nazareth kagin gi nyithindgi. Giparo ni Yesu wuotho gi jowadgi ka gidok. Kata kamano, ka gitieko wuoth odiechieng’ mokwongo e seche mag odhiambo, ok gine Yesu. Gimanye e kind wedegi koda osiepegi to ok en gi jogo! Kuom mano, gidok Jerusalem mondo gimanye kuno.

Gikone, giyudo Yesu kae, ka en gi jopuonj. Owinjogi, kendo openjogi penjo. To ji duto wuoro kaka Yesu riek. Kata kamano, Mariam wacho ni: ‘Nyathina, marang’o itimonwa kamano? Wuoru kod an waseparore ahinya ka wadwari.’

Yesu dwoko ni: ‘Ne umanya nikech ang’o? Ok nung’eyo ni onego abed e od Wuora koso?’

Ee, Yesu ohero bedo kama ipuonje wach Nyasaye. Donge kamano e kaka onego wan bende wabed? E dalagi Nazareth, Yesu ne dhi e romo mag lamo juma ka juma. To nikech ne osiko ka ochiko ite, ne opuonjore gik mang’eny mowuok e Muma. We mondo wabed kaka Yesu, kendo waluw ranyisi mare.