Yesu Miyo Ji Mang’eny Chiemo

GIMORO marach otimore. Oa neg Johana Jabatiso. Herodia ma chi ruoth ne ok ohere. Kendo ne omiyo ruoth ooro ji mondo ong’ad wi Johana.

Yesu ka winjo wachni, okuyo ahinya. Odhi kamoro kar kende, kendo obet kuro. Kata kamano, ji luwe. Yesu ka neno ji mang’enygo, okechogi. Kuom mano, owuoyo kodgi e wi pinyruodh Nyasaye, kendo ochango jo matuwo ma gin-go.

Chieng’no godhiambo, jopuonjrene biro ire to wachone ni: ‘Piny koro yuso to kae en thim. Kuom mano, we ni ji thuolo mondo odhi onyiew chiemo e mier man machiegni.’

Yesu dwokogi ni, ‘Ok ochuno ni nyaka gia. Migiuru chiemo gicham.’ Yesu ng’iyo Filipo to penje ni: ‘Ere kama wanyalo nyiewoe chiemo moromo miyo jogi duto chamo?’

Filipo dwoko ni: ‘Biro kawo pesa mang’eny ahinya mondo ng’ato ka ng’ato oyud mana gima tin mochamo.’ Andrea wachone ni: ‘Wuowini nikod makate abich gi rech ariyo. Kata kamano, magi ok bi romo jogi duto.’

Yesu wacho niya: ‘Nyisuru ji mondo obed piny e lum.’ Ogoyo erokamano ni Nyasaye kuom chiemo, kendo ochako pogogi matindo tindo. Bang’ mano, jopuonjrene pogo makate gi rech ne ji duto. Nitie chwo 5,000 kod mon gi nyithindo mang’eny. Giduto gichiemo ma nyaka giyieng’. Kendo ka jopuonjre choko chiemo modong’, gipong’o atonge apar gariyo!

Yesu koro miyo jopuonjrene idho yie mondo gidhi loka mar Nam Galili. E otienono, yamo maduong’ kudho, kendo apaka yuko yie koni gi koni. Jopuonjre oluor ahinya. Bang’e, e dier otieno gineno ng’at mawuotho e wi pi ka biro irgi. Luoro miyo gigoyo nduru, nikech ok ging’eyo gima gineno.

Yesu nyisogi ni, ‘Kik uluor. En an!’ Podi ok giyie. Kuom mano, Petro koro wacho: ‘Ka en in adier Ruoth, nyisa mondo abi iri e wi pi.’ Yesu dwoke ni: ‘Bi!’ Petro lor e yie to chako wuotho e wi pi! Bang’e luoro chako make kendo ochako nimo, kata kamano, Yesu rese.

Bang’e, Yesu kendo miyo ji mang’eny chiemo. Wang’ni otimo mano gi makate abiriyo kod rech moko matindo tindo, manok. To kendo podi nitie chiemo mang’eny moromo ji duto. Donge yo ma Yesu ritogo ji en yo maber miwuoro? Kinde ma obiro locho kaka ruoth moketi gi Nyasaye, chunywa ok bi chandore kuom gimoro amora!