Yesu Chango Jo Matuwo

YESU ka wuotho e pinyno duto, odhi nyime gi chango jo matuwo. Weche mag honni motimo landore e gwenge koda kuonde duto machiegni. Kuom mano, ji kelone rang’onde, mwofuni, joma itgi odinore kod ji mamoko matuwo. Kendo Yesu changogi giduto.

Higini adek koro osekalo nyaka ne Johana obatiso Yesu. Yesu nyiso jootene ni machiegini obiro dhi Jerusalem, to kuno ema ibiro negeye, kendo bang’e obiro chier koa kuom jo motho. To ka podi mano ok otimore, Yesu dhi nyime gi chango jo matuwo.

Chieng’ moro, Yesu puonjo e odiechieng Sabato. Sabato en odiechieng yueyo mar Jo-Yahudi. Dhako mineno kae, osebedo ka tuwo ahinya. Kuom higini 18, osebedo ka okulore, kendo ne ok onyal chung’ tir. Kuom mano, Yesu keto lwetene kuome, kendo ochako chung’ malo. Ochange!

Mani miyo mirima mako jotend din. Achiel kuomgi wacho ne ji kama: ‘Nitie odiechienge auchiel ma onego ji oti. Mago e odiechienge ma unyalo biro mondo ochangu, ok chieng’ Sabato!’

Kata kamano, Yesu dwoko ni: ‘Un jo maricho. Ng’at ang’ata kuomu nyalo gonyo kanyina mare mater mondo omodh pi chieng’ Sabato. Donge ber ka dhakoni mosebedo ka tuwo kuom higini 18, ochangi chieng’ Sabato?’ Dwoko ma Yesu chiwo miyo jo marichogi yudo wich kuot.

Bang’e, Yesu kod jootene wuotho kochomo Jerusalem. Ka gichopo machiegni gi dala mar Jeriko, ji ariyo ma mwofuni winjo ni Yesu kalo. Kuom mano, gikok niya: ‘Yesu, konywa!’

Yesu luongogi mondo gibi ire, kendo openjogi ni: ‘Ang’o ma udwaro mondo atimnu?’ Giwachone ni: ‘Ruoth, mi wengewa mondo oyepi.’ Yesu mulo wengegi, kendo gikanyono gichako neno! Be ing’eyo gimomiyo Yesu timo honni mabeyogi duto? En nikech ohero ji, kendo odwaro mondo gibed gi yie kuome. Kuom mano, wanyalo bedo gi geno ni kinde ma Yesu biro locho kaka Ruoth, onge ng’ato e piny manobed matuwo kendo.