Igoyo Stefano gi Kite

NG’AT mogoyo chonge piny kae, en Stefano. En japuonjre Yesu makare. Kata kamano, ne gima timorene sani! Jogi baye gi kite madongo dongo. En ang’o momiyo gimon gi Stefano ahinya makoro gitimone gima rachni? We mondo wane.

Nyasaye osebedo kakonyo Stefano timo honni mabeyo. Jogi ok ohero wachno, omiyo gichako kedo kode e wi gima omiyo opuonjo ji adiera. Kata kamano, Nyasaye miyo Stefano rieko mang’eny, kendo Stefano nyiso ni jogi osebedo kapuonjo miriambo. Mani medo wang’o igi ahinya. Kuom mano, gimake, kendo gikelo ji mondo obi owach miriambo kuome.

Jadolo maduong’ penjo Stefano ni: ‘Be gik ma iwachogi, gin adier?’ Stefano dwoko kokalo kuom twak maber moa e Muma. E giko mar twagno, onyiso kaka joma richo ne mon gi jonabi mag Jehova kinde machon ahinya. Bang’ mano, owacho ni: ‘Un uchal mana gi jogo. Ne unego Yesu jatich Nyasaye, kendo podi ok urito chike Nyasaye.’

Mani wang’o i jotend din-go ahinya! Girido lekegi kuom ich wang’. Kata kamano, Stefano ting’o wiye malo to wacho ni: ‘Ne! Aneno Yesu kochung’ e bad Nyasaye korachwich e polo.’ Ka giwinjo wechego, gidino itgi gi lwetegi, kendo gimwomore kuom Stefano. Gimake, kendo giywaye nyaka oko mar dalano.

Kagin oko kanyo, gilonyo lepgi to gimiyo rawera moro miluongo ni Saulo mondo orit lepgigo. Be ineno Saulo? Kendo moko kuom jogo chako bayo Stefano gi kite. Stefano goyo chonge piny mana kaka inyalo neno, kendo olamo Nyasaye: ‘Jehova, kik ikumgi kuom richoni.’ Ong’eyo ni moko kuomgi osewuond gi jotend din. Bang’ mano, Stefano tho.

Ka ng’ato otimoni gima rach, be itemo chulo kuor kata kwayo Nyasaye mondo ohinye? Mano ok e gima Stefano kata Yesu ne otimo. Ne ginyiso ng’wono kata ne joma ne ok nyisgi ng’wono. Watemuru mondo waluw ranyisi margi.