Yie Barore Negi e Chula

NE ANE! yie ni e chandruok! Obwasore matindo tindo! Be ineno jogo ma osechikore ei pi? Moko kuomgi chiegni chopo e dho nam. Be man kacha cha en Paulo? We mondo wane gima osebedo ka timorene?

Par ni Paulo osetwe Kaisaria kaka mabus kuom higini ariyo. Bang’e, ikete kaachiel gi mabuse moko e yie, kendo gidhi Rumi. E seche ma gikalo machiegni gi chula miluongo ni Krete, yamo mager chandogi. Yamono kudho matek ma ok ginyal tayo yie. Kendo ok ginyal neno wang’ chieng’ godiechieng’ kata neno sulwe gotieno. Gikone, bang’ ndalo mang’eny, joma ni ei yie weyo bedo gi geno moro amora ni inyalo resgi.

Bang’e, Paulo chung’ malo kendo wacho ni: ‘Onge kata ng’ato achiel kuomu, mabiro lalo ngimane; yie kende ema biro kethore. Nikech nyoro gotieno, malaika mar Nyasaye nyobiro ira mowachona ni, “Kik iluor, Paulo! Nyaka ichung’ e nyim Kaisar jatend Rumi. Kendo Nyasaye biro reso jogo duto man kodi e yie.”’

Machiegni gi chuny otieno e odiechieng’ mar 14 nyaka ne yamo chakre, joma ni ei yie nwang’o ni pi ok tut ahinya! To nikech giluor ni ginyalo tuomo lwendini e mudho, gibolo rachungini mag yie ei pi. Okinyi maluwe, gineno dho wath moro. Ging’ado wach ni, gitem kwang’o yie nyaka e wadhno.

Ka gichiegini chopo e dho wath, yie tuomo kuoyo kendo moko. Bang’e, apaka chako goyo yie kendo obwasore matindo tindo. Jalweny motelo e yieno wacho ni: ‘Ji duto kuomu manyalo goyo abal, chikreuru e nam mokwongo, kendo ugo abal nyaka e wath. Joma odong’ kuomu ochikore bang’gi, kendo makuru bathe yie mosebwasore.’ Kuom mano, mani e gima gitimo. Nikech mano, ji duto 276 ma ne ni e yie chopo e wath ka gingima, mana kaka malaika ne osingo.

Chulano iluongo ni Melita. Jo-Melita gin jo mang’won ahinya, kendo gikonyo jogo mowuok e yie. Ka kit yamo bedo maber, Paulo iketo e yie machielo, kendo itere Rumi.