Somo mar 8

Dak mar Joot Mamoro Nyasaye

Kar dichwo en ang’o e ot? (1)

Dichwo onego dagi gi chiege nade? (2)

Wuoro nigi tije mage? (3)

Kar dhako en ang’o e ot? (4)

Nyasaye dwaro ni jonyuol gi nyithindo otim ang’o? (5)

Muma wacho ang’o kuom pogruok kendo werruok e kind dichwo gi dhako? (6, 7)

1. Muma wacho ni dichwo e wi ot. (1 Jo Korintho 11:3) Dichwo nyaka bed gi dhako achiel kende. Onego gikendre eyo makare e bwo chik.—1 Timotheo 3:2; Tito 3:1.

2. Dichwo onego oher chiege mana kaka oherore owuon. Onego otimne kaka Yesu timone jolupne. (Jo Efeso 5:25, 28, 29) Ok onego ogo chiege kata matin kata timo ne rach eyo moro amora. Onego omiye duong’ gi luor.—Jo Kolosai 3:19; 1 Petro 3:7.

3. Wuoro onego oti matek mondo orit joode. Nyaka ochiw chiemo, lewni, kod kar dak ne chiege kod nyithindo. Wuoro bende nyaka puonj joode weche mag Nyasaye. (1 Timotheo 5:8) Okawo thuolo mar telo ne joode mondo gipuonjre wach Nyasaye kod dwaro mag Nyasaye.—Rapar mar Chik 6:4-9; Jo Efeso 6:4.

4. Dhako onego obed jakony maber mar chwore. (Chakruok 2:18) Onego okony chwore kuom puonjo kendo tiego nyithindgi. (Ngeche 1:8) Jehova dwaro mondo dhako orit joode gi hera. (Ngeche 31:10, 15, 26, 27; Tito 2:4, 5) Owinjore omi chwore luor ahinya.—Jo Efeso 5:22, 23, 33.

5. Nyasaye dwaro ni nyithindo oluor jonyuolgi. (Jo Efeso 6:1-3) Odwaro ni mondo jonyuol opuonj kendo orie nyithindgi. Dwarore ni jonyuol okaw thuolo mar bedo kod nyithindgi mondo gi puonjgi Muma, mondo gimigi kony makonyo chunygi kod kony mag weche Nyasaye. (Rapar mar Chik 11:18, 19; Ngeche 22:6, 15) Jonyuol ok onego orie nyithndgi gi gero.—Jo Kolosai 3:21.

6. Ka dichwo gi dhako ok winjre, onego gitem konyore gi puonj mar Muma. Muma jiwowa mondo waher ji kendo wang’won ne ji. (Jo Kolosai 3:12-14) Wach Nyasaye ok oyie pogruok kaka yo mar tieko chandruok matindo-tindo. Kata kamano, dhako nyalo yiero mondo owe chwore ka chwore (1) wiye tek ok dwar chiwo kony ni joode, (2) oger moloyo ma ngima mar chiege nie chandruok, kata (3) ka en gi akweda maduong’ ma miyo ok onyal lamo Jehova.—1 Jo Korintho 7:12, 13.

7. Dichwo gi dhako nyaka bed jo ma ogenore giwegi. Terruok en richo ne Nyasaye kendo ne ng’ama ukendoru godo. (Jo Hibrania 13:4) Muma wacho ni terruok kende ema nyalo kelo weruok gi kendo ng’at machielo. (Mathayo 19:6-9; Jo Rumi 7:2, 3) Jehova osin gi ji maketho kend eyo maok oluwore gi Muma to bang’e gi kendore gi nga’t machielo.—Malaki 2:14-16.

[Picha manie ite mar 17]

Nyasaye dwaro ni mondo jonyuol opuonj nyithindgi kendo giriegi

[Picha manie ite mar 17]

Wuoro ma jahera miyo joode gik ma dwarore kendo opuonjogi weche mag Muma