Somo mar 9
Jotich Nyasaye Nyaka Bed Maler
Ang’o momiyo nyaka wabed maler e yore duto? (1)
Ang’o ma en bedo maler e roho? (2) bedo maler e tim? (3) bedo maler e paro? (4) bedo maler e del? (5)
Weche mage mochido monego wawerego? (6)
1. Jehova Nyasaye ler e yore duto. Odwaro ni jomalame osik kaler—e roho, e tim, e paro, kendo e del. (1 Petro 1:16) Ok en gima yot bedo maler e wang’ Nyasaye. Wadak e piny mochido. Bende wakedo kod pachwa wawegi ma dwaro mondo watim richo. Kata kamano ok onego waol.
2. Bedo maler e Roho: Ka wadwaro tiyo ni Jehova, ok wanyal siko kawamako puonj kata timbe ma ok adiera. Nyaka waa e din ma ok adiera kendo ok onego wakonye e yo moro amora. (2 Jo Korintho 6:14-18; Fweny 18:4) Ka wasepunjore adiera kuom Nyasaye, nyaka watang’ mondo kik joma puonjo miriambo owuondwa.—2 Johana 10:11.
3. Timbe maler: Jehova dwaro jomalame mondo obed gi timbe mabeyo kaka Jokristo maradier kinde duto. (1 Petro 2:12) Oneno gimoro amora ma watimo, kata gima opondo. (Jo Hibrania 4:13) Onego wawe chode kod timbe moko mochido mag pinyni.—1 Jo Korintho 6:9-11.
4. Bedo Maler e Paro: Timwa bende bedo maler ka wapong’o pachwa kod weche makare. (Jo Filipi 4:8) To ka wasiko kawaparo gik mochido, mano biro miyo watim timbe maricho. (Mathayo 15:18-20) Onego wawe timbe mag mor manyalo chido pachwa. Wanyalo pong’o pachwa kod gik maler kuom puonjruok Wach Nyasaye.
5. Bedo Maler e Ringruok: Nikech gichung’ ni Nyasaye, Jokristo onego orit dendgi kod lepgi maler. Onego walogi bang’ losruok, kendo onego walogi kapok wachiemo kata mulo chiemo. Ka ionge gi hotogoro mar golo oko gik mochido, losruok nyaka yiki. (Rapar mar Chik 23:12, 13) Rito del maler kelo ngima maber. Dala Jakristo onego bed maler oko gi iye. Onego obed kaka ranyisi maber ni jogweng’.
6. Weche Maler: Jotich Nyasaye nyaka wach adiera ndalo duto. Jomiriambo ok nodonjie Pinyruodh Nyasaye. (Jo Efeso 4:25; Fweny 21:8) Jokristo ok wach weche ma kuodo wich. Ok giwach kata chiko itgi ni ngera kata weche mochido. Nikech wechegi ler, gipogore gi jomoko kar tich kata e skul kendo kama gidakie.—Jo Efeso 4:29, 31; 5:3.
[Picha manie ite mar 19]
Jotich Nyasaye nyaka bed maler e yore duto