Nyasaye Dwaro ni Mondo Ibed Osiepne

Nyasaye dwaro ni mondo ibed osiepne. Bende isega paro ni inyalo bedo osiep Ng’at madwong’ mogik e polo gi piny? Ibrahim, mane odak chon, nolwongi ni osiep Nyasaye. (Jakobo 2:23) Jomoko ma Muma wuoyo kuomgi bende ne osiepe Nyasaye, kendo ne ogwedhgi ahinya. Ndalogi, e piny duto nitie joma osebedo osiepe Nyasaye. In bende inyalo bedo osiep Nyasaye.

Bedo osiep Nyasaye ber moloyo bedo osiep dhano moro amora. Nyasaye ok nyal chwanyo osiepene momakore kode. (Zaburi 18:25) Bedo osiep Nyasaye ber moloyo bedo gi mwandu. Jamwandu kotho, pesane dhi ne jomoko. Kata kamano, osiepe Nyasaye nigi mwandu ma onge ng’ama nyalo kao.​—Mathayo 6:19.

Jomoko nyalo temo tami ni kik ipuonjri weche Nyasaye. Kata mana osiepeni moko kod joodu nyalo tami. (Mathayo 10:36, 37) Ka jomoko nyieri, kata teti, penjri kama, ‘Adwaro moro ng’awa​—dhano koso Nyasaye?’ Bende parie: Ka ng’ato wachoni ni kik ichiem, diyie kode? Ok diyie! Mondo idagi, nyaka ichiem. Nyasaye to nyalo miyo idagi nyakachieng’! Omiyo kik iwe ng’ato otami ni kik ipuonjri kaka inyalo bedo osiep Nyasaye.​—Johana 17:3.