Paradis Chiegni!

Gik maricho matimore e piny sani nyiso ni Paradis chiegni. Muma ne owacho ni wanane ndalo mag chandruok ka Paradis chiegni biro. Wadak endalogo sani! Magi gik moko mane Muma owacho ni notimre:

Lwenje madongo. “Oganda noked gi oganda, kendo pinyruoth gi pinyruoth.” (Mathayo 24:7) Wach mane okorni tinde timore. Chakre 1914, lwenje ariyo madongo momako piny duto osetimore kod lwenje mamoko matindo. Ji gana mang’eny osetho e lwenjego.

Tuoche mang’eny. “Tuoche” nobedie. (Luka 21:11) Bende tuoche nitie? Ee. Kansa, tuoche mag chuny, kahera, maleria, ayaki, gi tuoche mamoko osenego ji gana mang’eny.

Nok mar chiemo. E piny duto, nitie joma ok nigi chiemo moromo. Ji gana mang’eny tho higa ka higa nikech kech. Ma en ranyisi machielo ni Paradis chiegni chopo. Muma wacho: “Kech nobedie.”—Mariko 13:8.

Yiengni mar piny. ‘Piny noyiengni kuonde ka kuonde.’ (Mathayo 24:7) Mani bende timore e ndalowa. Jomokalo gana achiel osetho e yiengruok mar piny chakre 1914.

Jo maricho. Ji nobed ‘jo mohero pesa’ kendo “moherore giwegi.” Gini bed “jo mohero mor mar piny moloyo hero Nyasaye.” Nyithindo ‘ok no winj jonyuolgi.’ (2 Timotheo 3:1-5) Donge diyie ni nitie ji mathoth machal kamano ndalogi? Ok gi luoro Nyasaye, kendo gi kelo chandruok ni jo matemo puonjore weche Nyasaye.

Mahundu. “Mahundu nomedre.” (Mathayo 24:12, New World Translation) Inyalo yie ni sani mahundu rach moloyo higni mosekalo. Inyalo kual gigi, inyalo wuondi, kata inyalo hinyi kuonde duto.

Gigi duto nyiso ni Pinyruodh Nyasaye chiegni. Muma wacho: “Kuneno ka magi timore, ng’euru ni pinyruodh Nyasaye chiegni.” (Luka 21:31) Pinyruodh Nyasaye en ang’o? En loch mar Nyasaye manie polo mabiro kelo Paradis e pinyni. Pinyruodh Nyasaye biro golo loch mag dhano.​—Daniel 2:44.