Ang’o ma Gipuonjo?

JONENO MAG JEHOVA oyie kuom Jehova Nyasaye Manyalo gik moko duto, Jachwech polo gi piny. Gik ma ochwe mabeyo miwuoro ma waneno, nyiso maler ni nitie Jachwech mariek kendo ma tekone ng’eny ma ne ochweyogi. Mana kaka inyalo ng’eyo kit dhano kaluwore kod tije, e kaka wanyalo ng’eyo Jehova Nyasaye bende. Muma nyisowa ni “gik ma ok ne mag Nyasaye, kaka tekone mochwere, gi kite, mineno kuom gik ma en nochueyo, nenore ratiro.” Kata obedo ni chwech manie polo ok wuo, “polo ohulo duong’ mar Nyasaye.”—Jo Rumi 1:20; Zaburi 19:1-4.

Ji ok chwe agulni kata loso televison gi kompyuta ka gionge gi gima omiyo. Piny kaachiel gi chwech mag yien koda le, beyo ma oloyo gigo ma dhano oloso. Kaka dend dhano ochwe en gima dhiero paro, kendo obwongowa ma watiyogo e paro en gima ber miwuoro! Kara ka dhano loso gikgi matindo ka gin gi gima omiyo, nyaka bedi ni nitie gima omiyo Jehova Nyasaye ne ochweyo gigo miwuoro! Ngeche 16:4 wacho niya: “Jehova osechweyo gik moko duto ni tich mowinjorenigi.”

Jehova ne ochweyo piny ka ne en gi gima omiyo, mana kaka ne olero ni dhano ariyo mokwongo: “Nyuoluru, kendo medreuru, upong’ piny. . . , kendo mondo ubedi gi teko kuom rech ma ni e nam, kendo kuom winy mahuyo e kor polo, kendo kuom gik mangima duto mawuotho e piny.” (Chakruok 1:28) Nikech ne gitamore luwo chik, Adam gi Hawa ne ok opong’o piny kod ji makare ma ne nyalo rito piny, yien koda le e yo makare. Kethogi ne ok nyal tamo dwaro mar Jehova chopo. Bang’ higini mang’eny ne ondiki kama: “En Nyasaye; ma nochweyo piny . . . , nochweyogo ok manono.” To “nolose mondo ji odagie.” Piny ok bi kethi to “osiko nyaka chieng’.” (Isaiah 45:18; Eklesiastes 1:4) Dwaro mar Jehova ne pinyni notimre: “Wachna mawacho ok nyal lokore, gik madwaro timo anatim.”—Isaiah 46:10.

Kuom mano, Joneno mag Jehova oyie ni piny biro siko nyaka chieng’, kendo ji duto ma timbegi luwore gi dwaro mar Jehova biro dak e piny maberno nyaka chieng’, bed ni gingima kata gisetho. Dhano duto orem, kendo gin joricho nikech gin koth Adam gi Hawa. (Jo Rumi 5:12) Muma wachonwa niya: “Misach richo en tho.” “Jo mangima ging’eyo ni gibiro tho: to jo motho ok ging’eyo gi moro.” “Ng’a maketho enotho.” (Jo Rumi 6:23; Eklesiastes 9:5; Ezekiel 18:4, 20) To kara ere kaka ginyalo dak kendo mondo giyud gweth mag pinyno? Mana ka okalo kuom tho mar Yesu Kristo ma ne obedo kaka rawar, nikech ne owacho kama: “An e chier, kendo an e ngima. Ng’a ma yie kuoma, kata otho nodok mangima.” “Ji duto manie liete nowinj dwonde kendo giniwuog oko.”—Johana 5:28, 29; 11:25; Mathayo 20:28.

Mani biro timore nade? Inyise e “wach maber mar pinyruoth” ma Yesu ne ochako lando ka ne en e piny. (Mathayo 4:17-23) Kata kamano, sani Joneno mag Jehova lando wach maberno e yo makende.

[Chat manie ite mar 13]

GIK MA JONENO MAG JEHOVA PUONJO

Puonj Ndiko Ma Omiyo

Geno mar jo motho en chier 1 Kor. 15:20-22; Joha. 5:28, 29; Joha. 11:25, 26

[Picha manie ite mar 12]

PINY . . . mochwe gi Jehova . . . orit gi dhano . . . idakie nyaka chieng’.