Jiwo Kendo Tego Jowinjo

KATA bed ni jotich Nyasaye nyagore gi chandruoge machalo nade, onego giyud jip e kanyakla mar Jokristo. Ahinya ahinya mondo mano otimre, jodong-kanyakla nyaka ne ni twege koda puonj ma gichiwo gin majiwo. Jodong-kanyakla onego obed “kaka kar buto ka yamo kudho matek, kendo kaka ka mogeng’ore ni koth maduong’; kaka aore mag pi e gweng’ motuwo, kaka tipo mar luanda maduong’ e piny ma onge pi.”—Isa. 32:2.

Ka in jaduong’-kanyakla, be twegeni duogo kendo hoyo chuny ji? Be gijiwo jogo matemo tiyo ne Jehova ka gichung’ motegno? Be gimiyo ji teko mar nano ka gitimo dwaro mar Nyasaye kata obedo ni thoth ji ok ohero winjogi kata kwedogi? To nade ka moko kuom jowinjo chunygi ool, chandore ahinya nikech yuto matin, kata nyagore gi tuwo marach maok nyal chango? Inyalo ‘tego’ oweteni gi weche mawuok e dhogi.—Ayub 16:5.

Ti gi thuolo ma in-go mar golo twak mondo ikony oweteni oyud geno koda teko mawuok kuom Jehova koda kuom gigo mochiwo kaka Muma, chokruok mag kanyakla, koda rawar.—Rumi 15:13; Efe. 6:10.

Parnegi Gik ma Jehova Osetimo. Yo maber ahinya mar jiwo ji en nyisogi kaka Jehova osekonyo joge mondo onyagre gi chandruok e kinde mokalo.—Rumi 15:4.

Jehova nowacho ne Musa ni ‘ojiw chuny’ Joshua kendo ‘otege’ kapok oganda Israel odonjo e Piny Manosingi, piny ma josigu ema nodakie gie kindego. Musa notimo mano nade? Ka Joshua winjo, Musa noparo ne oganda mangima gigo ma Jehova notimonegi kane giwuok Misri. (Rapar 3:28; 7:18) Bende, Musa nokwanonegi kaka Jehova nokonyogi ding’eny loyo Jo-Amor e lweny. Kae to Musa nojiwo Joshua niya: “Bedi matek kendo ma jachir.” (Rapar 31:1-8) Sama itemo jiwo oweteni, be ikonyogi yudo teko kuom paronegi gigo ma Jehova osetimonegi?

Seche moko ji neno ni chandruogegi ohewogi ahinya kendo giwuoro kabe gibiro yudo gweth mag Pinyruoth. Parnegi ni singo mag Jehova gin minyalo gen chuth.—Josh. 23:14.

E pinje moko, owetewa nie bwo sirkande mogoyo tij lendo marfuk. E chal ma kamago, jodong-kanyakla manyiso hera nyalo konyo Jokristo oyud teko kuom weche ma joote koda Yesu Kristo nokaloe. (Tich 4:1–5:42) Kendo onge kiawa ni nyiso kaka Nyasaye nochiko weche mondik e bug Esther biro jiwo owete obed gi chir.

Seche moko nitie joma biro e chokruoge mag kanyakla to ok gitim dongruok mokalo kanyo. Ginyalo paro ni kit ngimagi machon ne rach ahinya ma Nyasaye ok nyal weyonegi. Inyalo nyisogi kaka Jehova notimo ne Ruoth Manasse. (2 Weche 33:1-16) Kata inyalo wuoyo kuom Jo-Korintho machon ma noloko kit ngimagi mobedo Jokristo, kendo Nyasaye nokwanogi kaka jomakare.—1 Kor. 6:9-11.

Be dibed ni moko kuomgi paro ni chandruoge ma gikaloe nyiso ni Nyasaye ok mor kodgi? Inyalo paronegi gik ma Ayub nokaloe, koda kaka nomiye gweth mogundho nikech nochung’ motegno e winjruokne gi Jehova. (Ayub 1:1-22; 10:1; 42:12, 13; Zab. 34:19) Johoch manono noramo ni Ayub notimo richo moro. (Ayub 4:7, 8; 8:5, 6) Mopogore gi mano, kane Paulo gi Barnaba tego jopuonjre kendo ‘jiwogi ni mondo gisik e yie,’ Paulo gi Barnaba nowacho niya: “Onego wadonj e pinyruodh Nyasaye ka wakadho e sand mang’eny.” (Tich 14:21, 22) Kamano bende e kindewagi, inyalo tego jogo makalo e bwo tembe kuom nyisogi ni nano e bwo sand en gima dwarore ne Jokristo duto kendo en gima duong’ ahinya e wang’ Nyasaye.—Nge. 27:11; Math. 24:13; Rumi 5:3, 4; 2 Tim. 3:12.

Jiw jowinjo mondo opar kaka Jehova osechopo singo mage e ngimagi giwegi. Kiparonegi matin, ginyalo neno kaka Jehova osetimonegi mana kaka nosingo. E Zaburi 32:8, wasomo niya: “Anapuonji kendo nyisi yo ma nidhiye: Nang’adni rieko ka wang’a oneni.” Kikonyo jowinjo opar kaka Jehova osetayogi kata osetegogi, ibiro miyo gine e yo matut ahinya ni Jehova dewogi kendo biro konyogi gadier e tem moro amora ma gikaloe gie sani.—Isa. 41:10, 13; 1 Pet. 5:7.

Nyis ni Imor gi Gik ma Nyasaye Timo Gie Sani. Sama itemo jiwo oweteni, nyisgi gima Jehova timo gie sani. Wuoyo e yo manyiso ni imor gi wechego biro miyo jowinjo bende omor kodgi.

Nyis kaka Jehova konyowa nyagore gi chandruoge mag ngima. Onyisowa yo maber chuth mar dak. (Isa. 30:21) Olero gimomiyo nitie mahundu, timbe maok kare, dhier, tuoche, koda tho kendo onyisowa kaka obiro tiekogi giduto. Olworowa gi riwruok mar owete ma johera. Omiyowa mich majaber mar lemo. Oyiedhowa mondo wabed Joneno mage. Oyawo wang’wa neno ni oseket Kristo obedo jaloch e polo kendo ni ndalo giko mar piny marachni ruyore karumo.—Fwe. 12:1-12.

E wi gwethgo chak imedie chokruogewa mag kanyakla, mag alwora, koda mag distrikt. Kiwuoyo kuom michgi e yo manyiso ni imor kodgi gadier, ibiro jiwo jomoko mondo odhi nyime timo kinda mar chokore kanyachiel gi owete.—Hib. 10:23-25.

Ripode manyiso kaka Jehova gwedho kinda ma waketo e tij lendo bende tegowa. E kinde mag Jokristo machon kane Paulo gi Barnaba dhi Jerusalem, ne gimiyo ‘owete duto mor maduong’’ kuom lero adimba kaka joma ne ok gin Jo-Yahudi nolokore mobedo Jokristo. (Tich 15:3) In bende inyalo miyo owete obed mamor kuom nyisogi weche mosene majiwo yie.

Ji yudo jip momedore ka okonygi neno ni gima gitimo en gima duong’. Puogi kuom tich ma gitimo e tij lendo. Puo jogo ma dhi nyime nano ka gichung’ motegno kata obedo ni gitimo matin ahinya e tij lendo nikech gisebedo moti kendo gituwore. Parnegi ni Jehova wiye ok wil gi hera ma ginyiso nikech nyinge. (Hib. 6:10) Yie ma ng’ato nyiso e bwo tem nengone duong’ matamre gi nono. (1 Pet. 1:6, 7) Dwarore ni opar ne owetewa wachno.

Wuo gi Mor Kuom Geno mar Kinde Mabiro. Singo mag Nyasaye kuom kinde mabiro gin weche majiwo ahinya jogo duto mohero Nyasaye. Nyalo bedo ni thoth jowinjo osewinjo singogo nyadinwoya. Kata kamano, mor minyiso sama iwuoyo kuom singogi nyalo miyo ginere maler e pach jowinjo, nyalo miyo jowinjo obed gadiera ni singogo biro chopo, kendo nyalo miyo chuny ji omor ahinya kendo giduok erokamano maduong’ nikech singogo. Tiyo kod gik misepuonjori e Skul mar Tij Nyasaye nyalo konyi timo kamano.

Jehova owuon e Jajip Maduong kendo e Jalno matego joge. Kata kamano inyalo riwe lwedo e jiwo kendo tego ji. Sama iwuoyo gi kanyakla, ti gi thuolono chuth mondo ijiw kendo iteg ji.