Sula mar Apar Gadek
Oganda Mang’ongo e Nyim Kom-duong’ mar Jehova
1. (a) Mondo jotich Nyasaye ma ne odak ka pok onyuol Kristo, kata mana ji 144,000 oyud mich margi, en ang’o ma nyaka gikalie? (b) En ang’o mabiro nyalore ne “oganda mang’ongo” ma odak e ndalogi?
JOTICH Nyasaye makare, chakre Habil nyaka Johana Jabatiso ne oketo timo dwaro mar Nyasaye obed mokwongo e ngimagi. Kata kamano, giduto ne githo ka girito chier mar dak e piny manyien mar Nyasaye. Oganda mar ji 144,000 mabiro locho gi Kristo e Pinyruodh Nyasaye manie polo, bende nyaka tho eka giyud mich margi. Kata kamano, Fweny 7:9 nyiso ni e ndalogi ma gin ndalo mag giko, “oganda mang’ongo” ne dhi bedoe mawuok e pinje duto kendo ne ok gibi neno tho, to kar mano, gibiro bedo gi geno mar dak e piny nyaka chieng’. Be in achiel kuom jogo manie oganda mang’ongono?
Fwenyo Oganda Mang’ongo
2. Gin weche mage ma ne ofwenyore mokwongo ka podi ok ong’ere maler ni oganda mang’ongo ma ondiki e Fweny 7:9 gin jomage?
2 E higa mar 1923, jotich Jehova ne ofwenyo ni “rombe” mayudore e ngero mar Yesu e Mathayo 25:31-46 kod “rombe moko” ma ne owuoyo kuomgi e Johana 10:16, gin jogo ma nigi thuolo mar dak nyaka chieng’ e piny. E higa mar 1931 jogo ma iwacho e Ezekiel 9:1-11 ni oketnegi ranyisi e lela wang’gi, bende ne onwang’ ni gin jogo ma nigi geno mar dak e piny. Bang’e e higa mar 1935, ne ofweny ni oganda mang’ongo gin achiel kuom rombe mamoko ma Yesu nowuoyo kuomgi. Ndalogi, oganda mang’ongoni ma Nyasaye oyie godo osechopo dhano tara gi tara.
3. Ang’o momiyo weche ma wacho ni “ne gichung’ e nyim kom duong’” mar Nyasaye ok nyis ni gin kweth mobet e polo?
3 E Fweny 7:9, oganda mang’ongo ok nyisi ka joma obet e polo. Wacho ni gichung’ e “nyim kom duong’” mar Nyasaye ok nyis ni nyaka gibed mana e polo. Gin mana kama wang’ Nyasaye nenogi. (Zaburi 11:4) Gima nyiso adier ni oganda mang’ongo, “ma dhano ok nyal kwano,” ok en kweth mabiro dhi dak e polo nenore ratiro ka iporo kwan margi ma ok oketi, kod pogruok mantie e weche ma ondiki e Fweny 7:4-8 kod Fweny 14:1-4. E ndikogo, kwan mar jogo ma ogol e piny mondo odhi odag e polo ifwenyo ni gin ji 144,000.
4. (a) “Sand Maduong’no” ma oganda mang’ongo biro tonyie, en ang’o? (b) Mana kaka owachi e Fweny 7:11, 12, gin jomage ma neno oganda mang’ongo kendo riwore kodgi e lamo?
4 Fweny 7:14 wacho kama e wi oganda mang’ongo: “Jogi e jo mowuok e sand maduong’no.” Gitony e masira maduong’ moloyo moro amora ma dhano oseneno e piny. (Mathayo 24:21) E kinde ma gibiro dwoko erokamano ka giwacho ni Nyasaye gi Kristo ema owarogi, chwech makare manie polo noriwre kodgi e wacho ni: “Amina! Pak, gi duong’, gi rieko, gi erokamano, gi pwoch, gi teko, kod nyalo obed ni Nyasachwa nyaka chieng’! Amina.”—Fweny 7:11, 12.
Oganda Mang’ongo Nyaka Nyis ni Owinjore Giyud Warruok
5. Ere kaka wanyalo ng’eyo gima idwaro kuom jogo mabiro bedo e oganda mang’ongono?
5 Waro oganda mang’ongo mi gikal sand kata masira maduong’ en gima timore kaluwore gi chike makare mag Jehova. Kido mifwenyogo jogo ma ibiro war onyisi maler ei Muma. Kuom mano, en gima nyalore ni jogo mohero tim makare nyalo kawo okang’ sani kaka yo ma ginyisogo kinda mar bedo joma owinjore waro. Ang’o ma jogi nyaka tim?
6. Ang’o momiyo inyalo wach ni oganda mang’ongo chalo gi rombe?
6 Rombe gin le mamuol kendo ma bolore. Kuom mano, kane Yesu owacho ni en gi rombe mamoko ma ne ok ni e kweth madhi e polo, ne owuoyo kuom jogo ma ok bi dwaro mana dak e piny nyaka chieng’ kende, to bende gibiro bolore ne puonjne. Yesu ne owacho ni, “Romba winjo dwonda, kendo an ang’eyogi, kendo giluwa,”. (Johana 10:16, 27) Kuom adier, magi gin joma chiko itgi ne Yesu, ka giwinjo kendo gitimo gima owacho, to mano miyo gibedo jopuonjrene.
7. Gin kido mage ma jolup Yesu onego onyag kendo obedgo?
7 Gin kido mage mamoko ma ng’ato ka ng’ato kuom jogi ma gin jolup Yesu, onego obedgo? Wach Nyasaye chiwo dwoko ni: “Kuweyo kit ngimau machon onego ulony dhano machon . . . mi urwak dhano manyien, mochue e kido mar Nyasaye, kendo ma nyisore e tim makare kendo maler adier.” (Jo Efeso 4:22-24) Ginyago kido ma jiwo winjruok e kind jotich Nyasaye—“hera, mor, kuwe, horuok, miwafu, ng’wono, bedo adiera, muolo, ritruok.”—Jo Galatia 5:22, 23.
8. Oganda mang’ongo biro romo kod ang’o sama giriwo lwedo joma odong’ mowir mo kuom roho?
8 Oganda mang’ongo riwo lwedo jogo ma kwan-gi nok ma nigi geno mar dhi e polo, kendo matelo e tayo tij lendo. (Mathayo 24:14; 25:40) Rombe mamokogo riwogi lwedo, kata obedo ni ging’eyo ni gibiro romo gi akwede nikech kane ndalo mag giko ochakore, Kristo Yesu kod malaikene ne owito Satan kod jochiendene koa e polo. Mani ne okelo ‘lit ne piny . . . nikech Satan oselornu ka en gi mirima maduong’, kong’eyo ni ndalone tin.’ (Fweny 12:7-12) Omiyo, kaka giko mar pinyni medo kayo machiegni, e kaka Satan bende medo akwede ne jotich Nyasaye.
9. Jotich Nyasaye osebedo gi dongruok nade e tij lendo, to ang’o momiyo mano osebedo kamano?
9 Kata obedo ni nitie sand mager, tij lendo podi dhi nyime. Kochakore gi ji gana manok kende ma ne lando wach Pinyruoth e giko mar Lweny Mokwongo mar Piny, kwan-gi sani osechopo tara gi tara nikech Jehova ne osingo ni: “Onge gir lueny mothedh mar kedo kodi ma dinyal timo gi moro.” (Isaiah 54:17) Kata mana achiel kuom jokanyo mag od ng’ado bura mar Jo-Yahudi ne ofwenyo ni tij Nyasaye ok nyal chungi. Ka owuoyo kuom jopuonjre e kinde mag Jokristo ma ne okwongo betie, ne onyiso Jo-Farisai kama: “Wegiuru. Nikech ka wachni kata tichni oa kuom dhano, obiro kethore; to koa kuom Nyasaye, ok unyal kethe; miti diyudu kukedo gi Nyasaye.”—Tich Joote 5:38, 39.
10. (a) ‘Ranyisi’ ma oket kuom jogo manie oganda mang’ongo nyiso ang’o? (b) Jotich Nyasaye winjo ‘dwol moa e polo’ kuom timo ang’o?
10 Jogo manie oganda mang’ongo inyiso kaka joma oketni ranyisi mar tony. (Ezekiel 9:4-6) ‘Ranyisino’ en gima nyiso ni gichiwore ne Jehova, ni osebatisgi kaka jopuonjre Yesu, kendo ni gitimo kinda mar bedo gi kido kaka mar Kristo. Giwinjo ‘dwol moa e polo’ mawacho kama e wi riwruok mar dinde mag miriambo ma otelne gi Satan: “Auru kuome, un joga; Mondo kik uriwru e richone, kendo kik unwang’ masichene.”—Fweny 18:1-5.
11. Jogo manie oganda mang’ongo nyiso nade e yo maler ni gin jotich Jehova?
11 Bende, Yesu ne owacho ni jolupne ni: “Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.” ( Johana 13:35) Mopogore gi mano, joma nie dinde mag pinyni nego joma gilemogo kinde mag lweny, mana nikech jogo owuok e pinje mopogore gi margi! Wach Nyasaye wacho kama: “Nyithind Nyasaye kod nyithind Satan ng’ere kuom wachni: ng’a ma ok tim makare ok en mar Nyasaye, kata ng’a ma ok her owadgi. . . waherre ng’ato gi ng’ato; to kik wabed kaka Kain, ma ne en mar Ng’a Marachno, kendo nonego owadgi.”—1 Johana 3:10-12.
12. E masira maduong’, Jehova biro timo ang’o gi “yien” ma gin dinde manyago olembe maricho?
12 Yesu ne owacho kama: “Yien mabeyo duto nyago mana olemo mabeyo, to yien maricho nyago mana olemo maricho. Yath maber ok nyal nyago olemo maricho kata yath marach ok nyal nyago olemo mabeyo. Yien duto ma ok nyag olemo mabeyo ing’adogi oko, kendo iwitogi e mach. To olembgi e ma unung’egigo.” (Mathayo 7:17-20) Olembe ma dinde mag pinyni nyago nyiso ni gin “yien” maricho ma Jehova biro ketho e masira maduong’ mokayo machiegni.—Fweny 17:16.
13. Oganda mang’ongo nyiso nade ni “gichung’ e nyim kom duong’ mar” Jehova?
13 Fweny 7:9-15 nyisowa gigo mamiyo iwaro oganda mang’ongo. Inyisogi ka “gichung e nyim kom duong’ ” mar Jehova kanyachiel, ka giriwo lwedo loch ma Jehova nigodo e wi polo gi piny. “Giselwoko nenggi, kendo miyogi doko marachere gi remb Nyarombo,” manyiso ni giyie kuom misango mar Yesu, ma en misango ma golo richo. (Johana 1:29) Gisechiwore ne Nyasaye, kendo ginyiso chiwruokno kuom batiso mar nyumo ei pi. Omiyo gin gi nying’ maler e nyim Nyasaye ma nyisore gi nengini ma rochere ma girwako, kendo gitiyo tich maler ni Nyasaye “odiechieng’ gotieno.” Be nitiere yore ma inyalo miyo godo ngimani omed winjore kod weche manie Ndikogi?
Gweth ma Giyudo Sani
14. Moko kuom gweth makende ma jotich Jehova yudo kata mana gie sani gin mage?
14 Nyalo bedo ni iseneno gweth makende ma joma tiyo ni Jehova yudo kata mana gie sani. Kuom ranyisi, kane ipuonjori e wi dwaro makare mag Jehova, ne ing’eyo ni nitie geno maber mar kinde mabiro. Kuom mano, koro itiyo gi ngimani e yo maber, ma tiendeni, itiyo ne Nyasaye madier ka in gi geno majaber mar dak nyaka chieng’ e paradis e piny. Ee, Yesu Kristo ma en Ruoth “notelnigi [oganda mang’ongo] e sokini mag pi ngima.”—Fweny 7:17.
15. Joneno mag Jehova yudo gweth e yo mane nikech tiyo gi gima Muma wacho e wi wach siasa kod timbe makare?
15 Achiel kuom gweth ma oganda mang’ongo yudo en hera, bedo ei achiel, koda winjruok ma yudore e kind jotich Jehova e piny mangima. Nikech waduto wagago e tawo achiel mar Wach Nyasaye, waduto watiyo gi chike kod puonj machalre mayudore ei Wach Nyasaye. Mano emomiyo ok wan gi pogruok kuom weche mag siasa kata mag pinje. Bende, wadak ka waluwo chike makare matayo timbe ma Nyasaye dwaro kuom joge. (1 Jo Korintho 6:9-11) Kuom mano, kar bedo gi ywaruok, pogruok, kod timbe mag anjawo ma onya ahinya e piny, chal mar oganda Jehova inyalo luongi ni paradis mar roho [paradis mar bedo ei Wach Nyasaye]. Ne kaka ilero wachni e Isaiah 65:13, 14.
16. Kata obedo ni giromo gi chandruoge mayudore pile e ngima, jogo manie oganda mang’ongo nigi geno mane?
16 Ok en adier kata matin ni dhano matiyo ne Jehova gin joma ok nyal both. Kendo giromo gi chandruoge mayudore pile e ngima, kaka bedo gi kinde matek, kata hinyruok nikech lwenje mag piny kata obedo ni ok giked e lwenjego. Gin bende giyudo tuoche, chandruok koda tho. Kata kamano, gin gi yie ni e piny manyien, “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.”—Fweny 21:4.
17. Kata bed ni ang’o matimorenwa sani, jogo ma lamo Nyasaye madier nigi geno mane mar kinde mabiro?
17 Kata ka dipo ni ilalo ngimani sani nikech bedo moti, tuwo, aksident, kata sand, Jehova biro chieri mondo ibi idag e Paradis. (Tich Joote 24:15) Bang’ mano, ibiro dhi nyime gi chiemo e nyasi mar gago e Wach Nyasaye kuom kinde mag Higini Gana Achiel mar Loch Kristo. Kaka imedo neno dwaro mar Nyasaye ka chopo e yo maber miwuoro, e kaka ibiro medo hero Nyasaye. Kendo gweth mag ringruok ma Jehova biro chiwo kindego biro medo herani kuome ahinya. (Isaiah 25:6-9) Mano kaka kinde maber miwuoro orito oganda Nyasaye!
Be Inyalo Paro?
• Muma tudo oganda mang’ongo gi wach mane maduong’ ma biro timore?
• Ka kuom adier wadwaro ni mondo okwannwa ei oganda mang’ongono ma Nyasaye oyie godo, ang’o ma nyaka watim sani?
• Gweth ma oganda mang’ongo yudo sani koda ma gibiro yudo e kinde mabiro e piny manyien mar Nyasaye, mori e okang’ maromo nade?
[Picha manie ite mar 123]
Ji tara gi tara maloso oganda mang’ongo lamo Nyasaye madier ka gin ei achiel.