Sula mar Apar Gochiko
Dhiuru Nyime Yalo Wach Nyasaye gi Chir
1. (a) Jopuonjre Yesu ne olando wach mane maber, to kata kamano, moko kuom Jo-Yahudi ne otimo ang’o? (b) Gin penjo mage ma wanyalo penjre?
CHIEGNI higini madirom 2,000 mosekalo, Yesu Kristo ma en Wuod Nyasaye, ne owir mo kuom roho kaka jal ma ne dhi bedo Ruoth e wi piny mangima e kinde mabiro. Wasigu ma jotend din ne omiyo oneg Yesu, to kata kamano, Jehova ne ochiere kuom tho. Yudo ngima ma nyaka chieng’ koro ne nyalore kokalo kuom Yesu. Kata kamano, jopuonjre Yesu kane olando wach maberni e lela, ne ochak sandogi. Jomoko kuomgi ne otwe e jela, bende ne ochwadgi gi del mi ochikgi mondo giwe wuoyo e wi Yesu. (Tich Joote 4:1-3, 17; 5:17, 18, 40) Ang’o ma ne gidhi gitimo? Ang’o ma dine itimo in iwuon? Be dine idhi nyime yalo gi chir?
2. (a) En wach mane maber ma dwarore mondo olandi e ndalowagi? (b) Gin jo mage ma onego oland wach maberni?
2 E higa mar 1914, Yesu Kristo ma e Ruodh Pinyruodh Nyasaye, ne oketi e kom-duong’ e polo mondo olochi ‘e dier wasike.’ (Zaburi 110:2) Bang’ mano, Satan kod jochiendene ne owit e pinyka. (Fweny 12:1-5, 7-12) Ndalo mag giko mar piny marachni koro ne ochakore. Ka ndalogo ogik, Nyasaye biro ketho chenro duto mar piny ma Satan oteloeni. (Daniel 2:44; Mathayo 24:21) Jogo mabiro tony nobed gi thuolo mar dak nyaka chieng’ e piny ma ibiro loki mondo obed paradis. Ka iseyie gi wach maberni, ibiro bedo gi gombo mar nyiso jomoko. (Mathayo 24:14) Kata kamano, ji biro kawo wachno nade?
3. (a) Ji kawo nade wach maber mar Pinyruoth ma ilandonegi? (b) En penjo mane ma nyaka wapenjre?
3 Sama ilando wach maber mar Pinyruoth, jomoko biro yie, to ng’eny ji ok bi dewo. (Mathayo 24:37-39) Jomoko nyalo jari kata kwedi. Yesu ne ochiwo siem ni akwede nyalo wuok kuom wedeni. (Luka 21:16-19) Akwede bende nyalo wuok kama itiye kata e skul misome. E pinje moko, Joneno mag Jehova ogo marfuk gi sirkal. Ka gik ma kamago otimore, be ibiro dhi nyime lando Wach Nyasaye gi chir ma ‘ichung’ matek kuom yie’?—1 Jo Korintho 16:13.
Kik Wagen Kuom Tekrewa Wawegi
4. (a) Mondo wanyis ni wan jotich Nyasaye makare, achiel kuom gik manyalo konyowa en ang’o? (b) Ang’o momiyo chokruoge mag Jokristo konyo ahinya?
4 Achiel kuom gik manyalo konyowa bedo jotich Jehova makare en tiyo gi chenro moketo. Achiel kuom chenrogo en chokruoge mag kanyakla. Ndiko jiwowa mondo kik wawe ma ok wadhi e chokruok. (Jo Hibrania 10:23-25) Jogo ma osesiko ka gin Joneno mag Jehova mochung’ motegno, osebedo ka timo kinda mar chokruok kanyachiel gi Jokristo wetegi ma ok gibare. E chokruogegi, ng’eyo ma wan-go kuom Ndiko medore. Bende, wamedo winjo tiend puonj mag adiera mong’ere, kendo wamedo puonjore yore mopogore opogore mag tiyo kod puonjgo. Wamedo bedo machiegni gi Jokristo wetewa e lamo achiel, kendo ijiwowa timo dwach Nyasaye. Roho mar Jehova tayowa kokalo kuom kanyakla, kendo kokalo kuom rohono, Yesu bedo e dierwa.—Mathayo 18:20; Fweny 3:6.
5. Seche ma Joneno mag Jehova ogo marfuk, ang’o ma itimo gi wach chokruoge?
5 Be idhi e chokruoge duto ma ok ibari, to be itiyo e ngimani gi puonj ma iwinjo kuno? Seche moko, ka ogo Joneno mag Jehova marfuk, chuno ni nyaka gitim chokruoge e grube matindo e utegi. Kuonde ma itimoe chokruok koda seche ma itimogie nyalo lokore, kendo nyalo bedo seche ma ok ber kinde duto nikech chokruoge moko inyalo tim e seche mag otieno ahinya. Kata kamano, kata bed ni chenrono nyalo bedo matek luwo kendo nyalo kelonigi chandruok, owete kod nyimine mochung’ motegno timo kinda mondo omi gibed e chokruogego duto.
6. Ere kaka wanyalo nyiso ni wageno kuom Jehova, kendo timo kamano nyalo konyowa nade mondo wadhi nyime wuoyo gi chir?
6 Geno kuom Jehova en gima igero kokalo kuom wuoyo kode e lamo mawuok ei chunywa pile ka pile, nikech wang’eyo ni kony mawuok kuom Nyasaye en gima dwarore. Be itimo kamano? Yesu ne olemo nyadinwoya e kinde ma ne otiyo tich ma ne omiye e piny ka. (Luka 3:21; 6:12, 13; 22:39-44) Kendo e otieno mogik kapok ogure, ne ojiwo jopuonjrene kowacho ni: “Rituru kendo lemuru, mondo kik udonj kar tem.” (Mariko 14:38) Seche ma waromo gi jogo ma ok dew wach Pinyruoth ma walando, mano nyalo ketowa e tem mar dok chien e tij lendo. Ka ji jarowa kata sandowa, mano nyalo ketowa e tem mar weyo lendo ni eka mondo kik wayud chandruok. Kata kamano, ka wakwayo e lamo gadier mondo roho mar Nyasaye okonywa dhi nyime wuoyo gi chir, wabiro yudo teko ma geng’owa mondo kik tembego lowa mi wawe tij lendo.—Luka 11:13; Jo Efeso 6:18-20.
Ndiko Manyiso Joma Ne Olendo gi Chir
7. (a) Ang’o momiyo weche ma ondiki e Tich Joote gin weche ma wadwaro ng’eyo ahinya? (b) Dwok ane penjo ma oketi e giko mar paragrafni, ka ijiwo kaka wechego nyalo konyowa.
7 Weche ma ondiki e bug Tich Joote gin weche ma waduto wadwaro ng’eyo ahinya. Wechego nyiso kaka joote kaachiel gi jopuonjre moko machon—ma ne gin dhano kaka wan—ne oloyo akwede, ma gibedo joneno ma jochir kendo ma ochung’ motegno ka gitiyo ne Jehova. We wanon ane moko kuom ndikogo ka wakonyore gi penjo maluwogi kaachiel gi ndiko ma oketi. Sama watimo kamano, par ane kaka in iwuon inyalo yudo konyruok kuom gik ma isomo.
Be joote ne gin joma nigi somo ma mamalo ahinya? Be ne gin joma ne onyuol gi kido mar bedo joma ok luor gimoro, ma kata ang’o timore? (Johana 18:17, 25-27; 20:19; Tich Joote 4:13, Bible in Luo, 1976)
En ang’o ma ne omiyo Petro owuoyo gi chir e nyim od ng’ado bura mar Jo-Yahudi ma ne onwang’o oseng’ado buch tho ne Wuod Nyasaye owuon? (Mathayo 10:19, 20; Tich Joote 4:8)
Ne oyudo joote timo ang’o e jumbe ma ne otelo ka podi ok nokelgi e nyim Jobura? (Tich Joote 1:14; 2:1, 42)
Kane joloch ochiko joote mondo owe lendo e nying’ Yesu, Petro gi Johana ne ochiwo dwoko mane? (Tich Joote 4:19, 20)
Kane osegonygi, joote ne odwaro kony kuom ng’a? Be ne gilamo mondo sand orum, koso ang’o ma ne gikwayo? (Tich Joote 4:24-31)
Jehova ne ochiwo kony kotiyo kod ang’o kane jo akwede temo chungo tij lendo? (Tich Joote 5:17-20)
Joote ne onyiso nade ni ne ging’eyo gimomiyo ne ogonygi? (Tich Joote 5:21, 41, 42)
Kata mana e kinde ma jopuonjre mang’eny ne oke nikech sand, ang’o ma ne gidhi nyime gi timo? (Tich Joote 8:3, 4; 11:19-21)
8. Tij lendo ma jopuonjre machon ne otimo ne onyuolo ang’o maber, kendo ere kaka wan bende wayudo thuolo mar tiyo tijno?
8 Tich mar lando wach maber ne ok en kayiem. Jopuonjre madirom 3,000 ne obatisi e Pentekost mar higa 33 E Ndalowa. “Jo ma oyie kuom Ruoth nomedore moloyo, ji mang’eny, chwo gi mon.” (Tich Joote 2:41; 4:4; 5:14) Bang’ kinde, kata mana jal mager ma ne sando oganda Nyasaye, jal ma ne iluongo ni Saulo ma Ja-Tarso, ne obedo Jakristo kendo ne ochako yalo wach adiera gi chir. Ne ochako ng’ere kaka jaote Paulo. (Jo Galatia 1:22-24) Tich ma ne ochakore e kinde mag Jokristo ma ne okwongo betie podi ok ochung’. Kinda mar timo tijno osemedore ahinya e ndalogi mag giko, kendo osechopo e tunge duto mag piny. Wan kod thuolo makende mar tiyo tijni, kendo kaka wamedo time, wanyalo puonjore kuom ranyisi ma ne oketi gi joneno makare ma ne otelonwa.
9. (a) Paulo ne otiyo gi thuolo mage mag chiwo neno? (b) In itiyo gi yore mage e lando wach Pinyruoth ne jomoko?
9 Kane Paulo opuonjore adiera e wi Yesu Kristo, en ang’o ma ne otimo? “Gikanyono noyalo . . . ni Yesu en Wuod Nyasaye.” (Tich Joote 9:20) Ne onyiso erokamano kuom ng’wono ma ne ok owinjore yudo ma Nyasaye ne onyise, kendo ne ofwenyo ni ji duto ne dwarore oyud wach maber ma koro ne oseyudo en owuon. Paulo ne en Ja-Yahudi, kendo kaluwore gi tim Jo-Yahudi e kindego, ne ojadhi e sunagoke mondo ochiw neno. Bende ne olendo ot ka ot, kendo ne owuoyo gi ji e chirni. Kendo ne oikore mar dhi kuonde mamoko mondo omi oland wach maber.—Tich Joote 17:17; 20:20; Jo Rumi 15:23, 24.
10. (a) Paulo ne onyiso nade ni kata obedo ni ne en jachir, bende ne otang’ gi yo ma ne ochiwogo neno? (b) Ere kaka wanyalo luwo tim mar Paulo ka wachiwo neno ne wedewa, joma watiyogo, koda joma wasomogo?
10 Paulo ne en jachir to kendo ne otang’, mana kaka wan bende onego wabed. Ne omulo chuny Jo-Yahudi kowuoyo kodgi kuom singo ma Nyasaye ne omiyo kweregi. Ne owuoyo gi Jo-Grik e wi weche ma ne gilonyie. Seche moko ne owuoyo kuom gik ma ne otimorene en owuon kane opuonjore adiera kaka yor chiwo neno. Ne owacho ni: “Atimo magi duto nikech Wach Maber, mondo adokie jakanyo.”—1 Jo Korintho 9:20-23; Tich Joote 22:3-21.
11. (a) Ang’o ma Paulo ne otimo mondo omi kik obed gi ywaruok mosiko gi jo ma ne kwede? (b) Gin kinde mage ma wanyalo luwoe ranyisi mar Paulo, to wanyalo timo kamano e yore mage? (c) Teko mar dhi nyime wuoyo gi chir wuok kanye?
11 Kane akwede omiyo obedo gima ber mondo Paulo owuogi odhi olend kama chielo kuom kinde, ne otimo kamano kar ywaruok gi joma ne kwede. (Tich Joote 14:5-7; 18:5-7; Jo Rumi 12:18) Kata kamano, ne ok one wichkuot ne wach maber ngang’. (Jo Rumi 1:16) Kata obedo ni Paulo ne ok winj maber nikech timbe ma ok nyis luor koda timbe mag gero mag joma ne kwede, ne ‘otimo chir kuom Nyasachwa’ mondo odhi nyime gi lendo. Ne owacho ni: “Ruoth ne ochung’ koda kotega, ni mondo ayal wachne chuth.” (1 Jo Thessalonika 2:2; 2 Timotheo 4:17) Yesu, ma en Wi kanyakla mar Jokristo, podi dhi nyime gi miyowa teko ma dwarore mondo omi watim tich ma ne okoro ni notimre e ndalowagi.—Mariko 13:10.
12. Ang’o manyiso ni Jokristo gin jochir, to ang’o momiyo ginyiso chirno?
12 Onge gima nyalo monowa dhi nyime yalo wach Nyasaye gi chir, mana kaka Yesu kod jotich mamoko makare mag Nyasaye ne otimo e kinde mag Jokristo ma ne okwongo betie. Mani ok nyis ni koro wabed joma ok par jomoko kata joma temo chuno jogo ma ok dwar mondo owinj wach ma walando. Kata kamano, ok wawe yalo mana nikech ji ok dew; kendo akwede ok mi wawe. Mana kaka Yesu ne otimo, wan bende wanyiso ji ni Pinyruodh Nyasaye e sirkal ma nigi ratiro mar locho e wi piny. Wawuoyo gi chir nikech wan jotich Jehova, Jaloch Polo gi Piny, kendo nikech wach ma walando ok en marwa, to en mare. Kendo hera ma waherogo Jehova ema onego obed gima duong’ ahinya mamiyo wapake.—Jo Filipi 1:27, 28; 1 Jo Thessalonika 2:13.
Be Inyalo Paro?
• Ang’o momiyo dwarore ahinya mondo waland wach Pinyruoth ne ng’ato ka ng’ato manyalore, to onego wang’e ni ji nyalo kawo wachno nade?
• Ere kaka wanyalo nyiso ni ok wagen kuom tekrewa wawegi e tiyo ne Jehova?
• Gin puonj mage mabeyo ma wayudo kuom bug Tich Joote?
[Picha manie ite mar 173]
Mana kaka e kinde machon, jotich Jehova ma ndalogi lando wach Nyasaye gi chir