KARE MAR 8

Tamri Din ma Miriambo; Lu Din Maradier

1. E wach lamo, ndalogi ji nyalo yiero ang’o?

YESU nowacho: “Ng’ato ma ok ni koda en jasika.” (Mathayo 12:30) Ji gin kor Jehova kata kor Satan. Ji mang’eny paro ni gitiyo ni Nyasaye e yoo moyiego, Muma to wacho ni Satan ‘wuondo piny ngima.’ (Fweny 12:9) Ji tara gi tara paro ni gilamo Nyasaye, to kare gitiyo ni Satan Jachien! Ndalogi, nyaka ji yier ka gidwaro tiyo ni Jehova ‘Nyasach adiera,’ kata ka gidwaro tiyo ni ‘Satan ma en wuon miriambo.’—Zaburi 31:5; Johana 8:44.

Weri kod Din ma Miriambo

2. Yoo achiel ma Satan temo geng’ogo ji mondo kik gilam Jehova en mane?

² Yiero tiyo ni Jehova en paro maber mamoro Nyasaye. Satan to ok mor kod ng’ato ang’ata ma tiyo ni Nyasaye; okelo chandruok ni jo ma tiyo ni Nyasaye. Yoo achiel motimo go kamano en miyo osiepeni gi joodu ng’ayoni wach kata kwedi. Yesu nowacho: “Wasik ng’ato nobed mana joode owuon.”—Mathayo 10:36.

3. Ka joodu kata osiepeni pingo kaka ilamo Nyasaye, ibiro timo ang’o?

³ Gima kamano ka otimoreni, ibiro timo ang’o? Ji mang’eny ong’eyo ni ok gilam Nyasaye e yoo makare, to podi ok giwe yorego. Giparo ni ka gitimo kamano, joodgi ok nomor kodgi. Bende mano ber? Kapo ni ifwenyo ni joodu madho njaga manyalo hinyogi, donge inyalo kwerogi? Ok inyal riwri kodgi madho njagano, donge?

4. Joshua nonyiso Joisrael ang’o kuom wach lemo e ndalone?

⁴ Joshua nojiwo Joisrael mondo giwe timbe kod chike maricho mag kweregi. Nowacho kama: “Kamano koro mondo uluor Jehova, kutiyone gi chuny kendo gadiera; kendo goluru nyisechego ma ne wuone otiyonigi loka Aora, kendo e Misri; un mondo uti ni Jehova.” (Joshua 24:14) Joshua nogeno Nyasaye, ma Jehova nogwedhe. Ka wageno Jehova, wan bende obiro gwedhowa.—2 Samuel 22:26.

Puonj Dinde—Adier kod Miriambo

Didek: Dinde mang’eny puonjo ni Nyasaye en Nyadidek. Giwacho ni “Wuoro en Nyasaye, Wuowi [Yesu] en Nyasaye, kendo Roho Maler en Nyasaye, to ni ok gin nyiseche adek, ni gin Nyasaye achiel.”

Muma ok wuo kata matin kuom “Didek,” bende ok opuonj ni nitiere nyiseche adek kuom achiel. Jehova kende e Nyasaye. Muma wacho kama e 1 Jo Korintho 8:6: “Wan to, wan gi Nyasaye achiel.” Jehova e maduong’ moloyo. Yesu ok en Nyasaye, en “Wuod Nyasaye.” (1 Johana 4:15) Kamano bende roho maler ok en Nyasaye. Roho maler ok en kata dhano. En teko mar Nyasaye.—Tich Joote 1:8; Jo Efeso 5:18.
Chuny: Dinde mang’eny puonjo ni chuny en gimoro man e dend dhano ma ok nyal tho. Muma to puonjo ni chuny en dhano, kendo dhano nyalo tho.—Chakruok 2:7; Ezekiel 18:4.
Mach ma ok tho: Dinde mag miriambo puonjo ni chunje mag jomaricho isando e mach nyakachieng’. Muma wacho ni ‘jo motho ok ong’eyo gimoro amora.’ (Eklesiastes 9:5) Muma kendo puonjo ni “Nyasaye en hera.” (1 Johana 4:8) Jehova, Nyasach hera, ok nyal sando ji gi mach.

Sanduku: Muma puonjo ang’o kuom Didek, chuny, kod mach ma ok tho?

Weri gi Gik ma Itiyogo e Din ma Miriambo

5. Onego waketh gik juok nang’o?

⁵ Weyo din ma miriambo bende dwaro ni waketh gimoro-amora ma wanyalo bedogo mitiyogo e timbe juok, machalo kaka ndagla, ris, mula, kod gik moko machalo kamago. En gima duong’ ahinya timo kamano nikech mano nyiso ni wageno Jehova.

6. Jokristo mokwongo notimo ang’o kod kitepegi mag juok?

⁶ Nee gima Jokristo mokuongo notimo kane gichako luwo din mar adier. Muma wacho: “To ji mathoth kuomgi bende ma notimo tim kireke nochoko kitepegi kanyachiel, mi giwang’ogi nyim ji duto. Ne gikwano nengogi, monwang’ oromo fedha gana piero abich.”—Tich Joote 19:19.

7. Wanyalo timo ang’o ka jochiende sandowa?

⁷ Jochiende nyalo sando jo makoro tiyo ni Jehova ma chon ne timo timbe juogi kaka tiyo gi bilo, ndagla, kata ido. Gima kama katimoreni, luong nying Jehova matek kilemo. Obiro konyi.—Ngeche 18:10; Jakobo 4:7.

8. Jokristo neno nade gik mopa, kod pichni mitiyogo e lamo ma miriambo?

⁸ Jo madwaro tiyo ni Jehova ok onego bedi kata tiyo gi gik lamo mopa, kata picha mitiyogo e lamo ma miriambo. Jokristo madier ‘wuotho kuom yie, ok kuom neno.’ (2 Jo Korintho 5:7) Giluwo chik Nyasaye makwero tiyo kod gimopa e lemo.—Wuok 20:4, 5.

Riwri gi Jo Jehova

9. Muma wacho nang’o kuom wach bedo mariek?

⁹ Muma wacho kama: “Ng’a mawuotho kod jo mariek nobedi mariek.” (Ngeche 13:20) Ka wadwaro bedo mariek, owinjore mondo wawuoth kata wariwre kod Joneno mag Jehova. Gin ema giwuotho e yoo madhi e ngima.—Mathayo 7:14.

10. Joneno mag Jehova nyalo konyi nade mondo iti ne Nyasaye?

¹⁰ Kuom adier, Joneno ohero ji. Tijgi en konyo jokma ratiro machunygi dwaro ng’eyo adiera mag Muma matero ji e ngima mochwere. Ginyalo konyi puonjori Muma nono ma onge chudo. Gibiro duoko penjoni, kendo gibiro nyisi kaka inyalo tiyo gi weche mantie e Muma.—Johana 17:3.

11. Chokruok mag Jo Kristo biro konyi nade?

¹¹ Kidhi e chokruokgi, ma gitimo e Od Pinyruoth, ibiro nge’yo ahinya yore Jehova. Ibiro jiw gomboni mar luwo din maradier. Kendo ibiro konyi ng’eyo kaka inyalo konyo jo moko bende puonjre adiera mag Muma.—Jo Hibrania 10:24, 25.

12. Lamo nyalo konyi nade tiyoni Nyasaye?

¹² Kaka imedo puonjori dwach Jehova, e kaka inyalo medo hero yorene. Dwarore ni kendo imed hero timo gima more, kendo imed weyo gik ma ok more. Ng’e ni inyalo lamo Jehova kikwaye mondo okonyi timo gima ni kare, kendo iwe timo gik ma ok kare.—1 Jo Korintho 6:9, 10; Jo Filipi 4:6.

Joot ma somo Muma kanyachiel — Inyalo luwo din mar adier nade?

13. Inyalo moro chuny Jehova nade?

¹³ Bang’e kaka imedo dhi nyime, ibiro dwaro bedo Janeno mar Jehova mochiwore e yor Batiso. Ka iriwori gi jo Nyasaye, ibiro moro Jehova. (Ngeche 27:11) Inibed achiel kuom jo mamor ma Nyasaye wuoyo kuomgi kama: “Abiro dak e igi, kendo nawuothi e diergi. Nabed Nyasachgi, to ginibed joga.”—2 Jo Korintho 6:16.

Nawera gi Jochiende

Otieno moro kane wanindo, duol moro noluonga didek. Kae to aneno ka tado yawore, to gima liet mong’inore ne oa malo moluar e iya. Chwora to ne ok ne gik manetimore. E dweche mane oluwo, nawinjo liet malich ahinya.

Dweche auchiel bang’ ma, duol cha noluonga kendo. Piyo piyo ot ne ochako chalo ka gima ne entie e i pi matut. Thuond ng’ielo maduong’ ne owuok e pigno ma omol e bada. Natemo yienge mondo olwar to otamore. Naluor ahinya. Eka thuondno kod pi nolal nono mi nolwara piny matek. Pacha ne olal kuom seche mang’eny. Eka duolno nonyisa ni adogi e abila juok mane ichangoe ji e gweng’. Kane apenjo rohono nyinge, nonyisa nying ma tiende ni “wuon mwandu, to onge nyathi.” Nosingore ni obiro miya teko mar chango ji ma abed jamwandu.

Jomatuo moa machiegni kata mabor ne biro ira. Ka pok ne gichopo e oda, ne anenogi e rang’i. Kane jatuo ochopo ne apamo lweta gi lwete, to sano-sano ne inyisa tuone kata chandruokne kod yoo mithiedhe go. Rohono bende ne nyisa pesa mane ji onego chul.

Nayudo pesa gi mich mang’eny nikech nachango ji ahinya. Nabedo “wuon mwandu,” kata kamano naneno lit mar bedo ‘ma onge gi nyathi.’ Kane anyuolo nyathi moro-amora, motelone ne nyaka tho. Gino ne litna ahinya. E higni 12 mane atiyo ni rohoni, nyithinda auchiel nene otho.

Nachako lemo ni Nyasaye mondo okonya. Nalemo ahinya. Chieng’ moro Joneno mag Jehova noduong’o dho oda. Kata obedo ni nene aheroga riembogi, chieng’no naneno ni awinjie wechegi. Kane wawuoyo, nafwenyo ni kare asebedo ka atiyo ni jachien! Ne aneno ni onego awe timbe juok.

Kane anyiso rohoni gima ne adwaro timo, ne okwera ahinya ni kik atim kamano. Kata kamano nawachone kama: “Awera kodi.”

Nawang’o gik moko duto mane atiyogo e tim juok. Napuonjora Muma kod Joneno, mabedo jatich Jehova, kendo ne obatisa e higa mar 1973. Koro sani an kod nyithindo abich mangima. Chwora bende ne osebatisi kaka Janeno.—Wachni owachi gi Josephine Ikezu.

Sanduku: Dhako moro ne owere nade gi jochiende?