Kaka Norit Yesu

SECHE moko Jehova timoga gik mabeyo miwuoro mondo orit joma tindo kod joma ok nyal ritore giwegi. Kidhi bayo e risaf, inyalo neno achiel kuom yore ma Jehova timogo kamano. Samoro ok inyal ng’eyo kaka mano timore.

Ineno ka winyo moro opiyo buti. Inyalo paro ni ohinyore. Ochako sweko bwombe e lowo, to kitemo chorri machiegni kode, e kaka omedo sudo mabor kodi. Kaka imedo luwe, e kaka omedo dhi mabor kodi. Kae to apoya nono, ofuwo mi odhi. Kara onge gimoro ma ohinyo bwombene! Be ing’eyo gima winyono ne temo timo?​—

Kitemo sudo machiegni gi kama winyono ne nitie to ifwenyo ni nyithinde ne ni machiegni kanyo. Winyono nende oluor ni inyalo yudo nyithinde mi ihinygi. Omiyo ne owuondre ni ohinyore mondo kik isud machiegni gi nyithinde. Be ing’eyo ng’at ma nyalo ritowa mana kaka winyo rito nyithinde?​—E Muma, ipimo Jehova gi winyo miluongo ni otenga ma rito nyithinde.​—Rapar mar Chik 32:11, 12.

Nyathi Jehova ma ogeno ahinya en Wuode ma Yesu. Ka Yesu ne nie polo, ne en chuech mar roho ma nigi teko mana kaka Wuon mare. Nonyalo ritore kende owuon. Kata kamano, ka ne onyuole e piny kae kaka nyathi, ne ok onyal ritre kende. Ne nyaka rite.

Mondo nochop dwach Nyasaye e piny ka, ne nyaka odong mi obed ng’at ma ng’ongo kendo makare. Kata kamano, Satan to ne dwaro nego Yesu ka pok obedo ng’at maduong’. Yo ma ne idwa neggo Yesu ka ne pod otin kod kaka Jehova norite en sigana mamit. Be diher winjo siganano?​—

Kinde matin bang’ ka ne osenyuol Yesu, Satan nomiyo sulwe moro ochako rieny yo Ugwe. Jokor wach matiyo gi sulwe, nowuotho ka giluwo sulweno nyaka Jerusalem. Ka ne gichopo kuno, ne gipenjo kama ne idhi nyuolie ruodh Jo-Yahudi. Kane openj joma ne olony gi weche manie Muma, ne giduoko ni: “E Bethlehem.”​—Mathayo 2:1-6.

Bang’ ka Herode, ma ne en ruoth marach ma ne locho Jerusalem owinjo ni nitie ruoth ma ne osenyuol Bethlehem, ne onyiso jokor wachka niya: “Dhiuru unon wach nyathi matinno, to ka uyude, uduokna wach.” Be ing’eyo gimomiyo Herode ne dwaro ng’eyo kama Yesu ne nitie?​—En Nikech Herode ne en janyiego kendo ne odwaro nege!

Ere kaka Nyasaye norito Wuode?​—Ka jokor wachka noyudo Yesu, ne gimiye mich. Bang’e, Nyasaye nosiemogi e lek ni kik gidog ir Herode. Omiyo ne gidhi gi yo machielo ma ok gidok Jerusalem. Ka ne Herode ofwenyo ni jokor wach nosedok thurgi, iye nowang’ matek. Herode nogolo chik mondo oneg nyithindo ma yawuoyi ma ne nie bwo higni ariyo ka dok piny ma ne ni Bethlehem, to notimo kamano ka dwache maduong’ ne en nego Yesu! Kata kamano, mano noyudo ka Yesu onge Bethlehem.

Be ing’eyo kaka Yesu notony?​—Bang’ ka jokor wach nosedhi thurgi, Jehova nochiko Josef ma ne en chwor Maria, mondo giring gidhi Misri. Mano e kaka Yesu notony e lwet Herode. Higni moko bang’e ka ne Maria gi Josef osewuok Misri gi Yesu, Jehova nochako omiyo Josef siem machielo. Nonyise ni odhi Nazareth, kama Yesu ne dhi dakie ma onge ng’at ma nyalo nege.​—Mathayo 2:7-23.

Be inyalo neno kaka Jehova norito Wuode?​—En ng’ano minyalo pim gi nyithind winy ma ne min-gi opando e bungu kata gi Yesu ka ne pod en nyathi? Donge in be ichal kodgi?​—In be nitie joma dwaro hinyi. Be ing’eyogi?​—

Muma wacho ni Satan chalo gi sibuor ma ruto kodwaro chamowa. To mana kaka kinde mang’eny sibuor yieroga le matindo mondo ocham, e kaka Satan kod jochiendene yieroga nyithindo mondo gihinygi. (1 Petro 5:8) Kata kamano, Jehova nigi teko moloyo Satan. Jehova nyalo rito nyithinde kendo onyalo ketho gimoro amora marach ma Satan nyalo timonegi.

Be inyalo paro gima ne wapuonjre e Sula mar 10 mar bugni ma Jachien kod jochiendene diher ni watim?​—Ee, gidwaro ni wadonj e timbe nindruok moko ma Nyasaye neno ni rach. To gin jomage kende monego bed ni timo timbe mag nindruok?​—Ee, en dichwo gi dhako mokendore.

Kata kamano, gima lit en ni nitie jomadongo mohero timo timbe mag nindruok gi nyithindo. Sama gitimo kamano, nyithindogo nyalo chako timo gik maricho ma gipuonjre kuom jomadongogo. Nyithindogo nyalo chako tiyo gi duong’gi e yo marach. Mano e gima ne otimore higni mang’eny mokalo e taon mar Sodom. Muma wacho ni ‘chwo duto madongo gi matindo,’ ne dwaro timo timbe mag nindruok gi chwo ma ne obiro limo Lut.​—Chakruok 19:4, 5.

Mana kaka ne dwarore ni orit Yesu, in be dwarore ni oriti kuom jomadongo kaachiel kod nyithindo ma nyalo dwaro timo timbe mag nindruok kodi. Kinde mang’eny, gibiro wuondore ni gin osiepeni. Ginyalo singo ni gibiro miyi mich moro ka ok inyiso jomamoko gima gidwaro timo kodi. Kata kamano, jogi gin joma richo kaka Satan kod jochiendene kendo gidwaro mana timo gik ma kelonegi mor. Gitemoga yudo morno sama gitimo timbe mag nindruok gi nyithindo. Mano en tim marach ahinya!

Be ing’eyo gima digiher timo mondo giyud mor?​—Ginyalo temo mulo kata tugo gi duong’ni. Kata ginyalo temo keto duong’gi e mari. Kata kamano, ok onego iyie mondo ng’ato ang’ata otug gi duong’ni, bed ni en owadu, nyaminu, minu, kata wuonu. Dugi en mari kendi.

Ere kaka inyalo ritori mondo kik timni timbe marichogo?​—Mokwongo, kik iyie mondo ng’ato otug gi duong’ni. Ka ng’ato otemo timoni kamano, wach matek niya: “Weri koda! Adhi fuli!” Ka dipo ni ng’at motimo kamano owachoni ni mano wachni, kik iyie kode. Mano ok en adier. Dhi adhiya mondo ifule kata obedo ni en ng’a! Onego ifule, kata ka onyisi ni gima utimono en wach maling’ ling’ e kindi kode. Kata mana ka ng’ato osingoni ni obiro miyi mich maber kata obuogoni ngima, onego iwuog kanyo kendo idhi ifule.

Ok onego iluor, kata kamano, onego ibed motang’. Ka dipo ni jonyuolni okweri ni iweri gi jomoko kata ni kik idhi kamoro, onego iwinjgi. Kitimo kamano, joma richo ok bi yudo thuolo mar hinyi.