Be Onego Warit Odiechienge ma Itimoe Nyasi mag Rapar?

ODIECHIENGE ma dinde kod pinje mang’eny timoe nyasi mag rapar e ndalogi, ok gin nyasi ma owuok ei Muma. To kare nyasi kaka magi ne ochakore nade? Ka inono ei buge, ibiro fwenyo gima buge wacho kuom odiechienge ma ji hinyo timoe nyasi mag rapar e gweng’ ma idakie. Ng’i ane ranyisi manokgi.

Ista (Chier mar Yesu). The Encyclopædia Britannica wacho kama: “Ei Muma Manyien, onge gima nyiso ni ji ne timo rapar mar chier Yesu.” Ista ne ochakore nade? En nyasi mar rapar ma ne ochakore gi jogo ma ne lamo nyiseche manono. Kata obedo ni ji wacho ni Ista en nyasi mar paro chier mar Yesu, gik ma ji timo e kinde mag Ista ok gin timbe mowinjore gi Jokristo.

Nyasi mag Chako Higa. Tarik kaachiel gi timbe ma ji timo e kinde mag rapar mar Chako Higa, opogore opogore e piny mangima. The World Book Encyclopedia wacho kama kaluwore kod chakruok mar nyasini: “Jatend Jo-Rumi, Julio Kaisar ne oketo Januar 1 kaka Odiechieng’ mar Chako Higa, ne otimo mano e higa mar 46 ka Kristo Podi. Jo-Rumi ne owalo odiechieng’ni ni Janus, nyasach rangeye, dhoudi, kendo mar chakruok. Januar en nying ma ne owuok e nying Janus ma ne nikod lela wang’ ariyo—achiel ne ng’iyo nyime to machielo ng’iyo chien.” Kuom mano, nyasi mag Chako Higa ne ochakore gi timbe mag jogo ma lamo nyiseche manono.

“Halloween.” Kaluwore kod nyasini machal kod timo rapar mar jo motho, The Encyclopedia Americana wacho kama: “Nyasi mar Halloween nikod tudruok gi nyasi moro mar Ajuoke mag Jo-Celtic ma ne itimo e kinde ma Jokristo ne podi ok obedoe. Jo-Celtic ne timo nyasi ni nyiseche ariyo—nyasach chieng’ kod nyasach jo motho . . . ma ne itimo tarik 1 Novemba, e chak Higa Manyien mar Jo-Celtic. Nyasi mar jo motho ne orwaki mos mos e nyasi mag Jokristo.”

Odiechienge Mamoko ma Itimoe Nyasi mag Rapar. Ok wanyal wuoyo e wi nyasi duto mag rapar ma ji timo e piny mangima. Kata kamano, odiechienge mag rapar ma ji rito mondo gimi godo dhano, kata riwruok mag dhano duong’, ok ni kare e nyim Jehova. (Yeremia 17:5-7; Tich Joote 10:25, 26) Ng’e bende ni, kaka nyasi ma dinde timo ne ochakore, en gima nyiso ka be Nyasaye oyie kodgi, kata ok oyie kodgi. (Isaiah 52:11; Fweny 18:4) Puonj mag Muma monyis e Sula mar 16 ei bugni, biro konyi ng’eyo kaka Nyasaye neno odiechienge mamoko mag rapar, mopogore gi nyasi mag rapar ma dinde kende ema timo.