Barua Mowuok Kuom Bura Matayo

Ne Jaland Wach Pinyruoth Wadwa:

Tem ane paro ni in achiel kuom joote ma ochung’ e Got Zeituni. Yesu chopo e nyimu. Ka ochiegni idho ka odhi e polo, owacho niya: “Ubiro yudo teko ka roho maler obiro kuomu, mi unubed jonenona e Jerusalem, kod Judea duto, gi Samaria, nyaka kuonde maboyo mogik e tung’ piny.” (Tich 1:8) Dine iwinjo nade?

Samoro dine iparo ni omiyou migawo mapek. Ne inyalo chako penjori ni, ‘Ere kaka wan joma nok kama wabiro chiwo neno “nyaka kuonde maboyo mogik e tung’ piny”?’ Samoro inyalo paro gima Yesu nowacho e otieno mogik ka ne pok otho niya: “Misumba ok duong’ moloyo ruodhe. Ka gisesanda, un bende gibiro sandou; ka giserito wachna, gibiro rito wachu bende. To gibiro timonu mago duto nikech nyinga, nimar ok ging’eyo Jal ma noora.” (Joh. 15:20, 21) Sama iparo matut wechego, inyalo chako penjori ni, ‘Ere kaka anyalo chiwo neno e okang’ mong’ith kata obedo ni ikweda kata isanda?’

E kindegi, wapenjore penjo kaka mago. Tich maduong’ ma wan-go kaka Joneno mag Jehova en chiwo neno nyaka “kuonde maboyo mogik e tung’ piny” ne “ogendni duto.” (Mat. 28:19, 20) Ere kaka wabiro timo tijni, to moloyo e kinde ma wayudo akwede kaka nokor?

Bug Tich Joote nyisowa kaka joote kod jowetegi e kinde Jokristo mokwongo nochopo migawo ma ne omigi nikech Jehova ne konyogi. Buk ma isomoni olos mondo okonyi nono matut wechego mondo iwinjgi kendo igo picha e pachi kaka wechego notimore. Ibiro neno kaka jotich Nyasaye e kinde Jokristo mokwongo ne chalre e yore mang’eny gi Jokristo ma kindegi. Ibiro fwenyo ni tijwa mar lendo kod kaka ochanwa mondo wati tijno chalre gi mar Jokristo mokwongo. Onge kiawa ni paro matut e wi wechego biro miyo imed bedo gadier ni Jehova Nyasaye dhi nyime tayo riwruok mar ogandane manie piny.

Walemo kendo wageno ni nono bug Tich Joote biro miyo imed bedo gi chir ni Jehova biro konyi kendo ni roho mare maler biro miyi teko. Wajiwi ni imed dhi nyime ‘chiwo neno e okang’ mong’ith’ e wi Pinyruodh Nyasaye kendo konyo jomamoko mondo giyud resruok.​—Tich 28:23; 1 Tim. 4:16.