Be Kinde Moko Iwinjo ka Iluor Kendo Iwinjo ka In Kendi?

Ng’iane wuowi manie pichani. Ochalo ng’at ma winjo ni en kende kendo oluor, donge? Be isegawinjoe kamano in be?— Ji duto winjoga kamano kinde ka kinde. Muma wuoyo e wi osiepe Jehova moko ma bende ne owinjo kamano. Achiel kuomgi ne en Elija. We wane ane sigande.

Elija ne odak e piny Israel chon ahinya kane pok onyuol Yesu. Ahab, ma ne en ruodh Israel, ne ok lam Jehova, Nyasaye madier. Ahab kaachiel gi chiege Jezebel, ne lamo nyasaye moro ma nono miluongo ni Baal. Omiyo thoth Jo-Israel ne ochako lamo Baal. Jezebel ne chunye rach ahinya kendo ne odwaro nego ji duto ma ne lamo Jehova moriwo kata Elija! Be ing’eyo gima Elija notimo?—

Elija ne oringo! Noringo odhi e thim mi opondo e bur moro kuno. Iparo ni ang’o momiyo ne oringo?— Noringo nikech ne oluor. Kata kamano, Elija ne ok onego obed maluor. Nikech ang’o? Nikech ne ong’eyo ni Jehova nyalo konye. Kinde ma ne osekalo, Jehova nosenyiso Elija kaka ne en Nyasaye ma nigi teko. Chieng’ moro, Nyasaye ne odwoko kwayo mar Elija kuom oro mach oa e polo. Omiyo, kata mana gie kinde ma ne Elija oluorieni, Nyasaye ne pod nyalo konye!

Kane Elija nie bur ma ne opondoeno, Jehova nopenje niya: ‘Itimo ang’o kae?’ Elija nodwoko Nyasaye niya: ‘An kenda ema pod alami. An kenda ema adong’, kendo aluor ni ibiro nega.’ Elija ne paro ni ne oseneg jotich Jehova duto. To Jehova ne okwero Elija konyise ni, ‘Ok kamano ngang’. Nitiere ji 7,000 ma pod lama. Omiyo, bed jachir. Tich ma adwaro ni itim pod ng’eny!’ Donge wachno ne omoro Elija?—

Ang’o minyalo puonjori kuom gima ne otimore ne Elija?— Ok onego ipar kata matin ni in kendi, kendo onge tiende bedo maluor. In gi osiepe mang’eny mohero Jehova kendo moheri. E wi mano, Jehova nigi teko mang’eny kendo obiro konyi kinde duto! Donge imor ng’eyo ni onge kinde moro amora ma inie kendi?—