Kaka Unyalo Tiyo gi Pesa

Mondo warit joodwa, pesa en gima dwarore. (Ngeche 30:8) Kuom adier, ‘fedha en rageng’.’ (Eklesiastes 7:12) Ok en gima yot ne joma okendore wuoyo e wi pesa. Kata kamano, kik uwe pesa okel chandruoge e kend maru. (Jo-Efeso 4:32) Joma okendore onego obed gi genruok e kindgi, kendo ging’ad kanyachiel kaka gibiro tiyo gi pesa.

1. BEDURU GI CHENRO MABER

GIMA MUMA WACHO: “En ng’a kuomu ma ka dwaro gero ot ma rabora ok obi bet piny mondi kendo kwano nengo mondo one ka en-gi gima orome tieko odno?” (Luka 14:28) Dwarore ni uchan kanyachiel kaka ubiro tiyo gi pesau. (Amos 3:3) Nonuru gik mudwaro ng’iewo. Nonuru bende ka un gi nyalo mar ng’iewogi. (Ngeche 31:16) Kata ka un gi pesa ma nyalo ng’iewo gimoro ok nyis ni koro onego ung’iewe. Temuru ahinya mondo gik ubed gi gope. Chanuru tiyo mana gi pesa ma un-go.—Ngeche 21:5; 22:7.

GIK MUNYALO TIMO:

• Kapo ni udong’ gi pesa moko bang’ chulo gik ma dwarore, ng’aduru kanyachiel kaka ubiro tiyo gi pesa modong’

• Kapo ni bajet maru ne okalo pesau, kawuru okenge ma biro duoke piny. Kuom ranyisi, nyalo bedo maber ka utedo chiembu kar dhi chiemo e otel

2. WUOURU AYANGA KENDO UBED JO ADIER

GIMA MUMA WACHO: ‘Timuru gik moko duto ka uritoru ma onge mibadhi, ok mana e wang’ Jehova kende, to bende e wang’ dhano.’ (2 Jo-Korintho 8:21) Bed ja adier gi jaodi kinyise kwan pesa ma ijayudo kod mitiyogo.

Kinde duto wuo gi jaodi ka pok itiyo gi pesau e timo gimoro maduong’. (Ngeche 13:10, The Bible in Luo, 1976) Wuoyo ayanga e weche mag pesa biro miyo kuwe obed e kend maru. Kik ikaw pesa ma ijayudo kaka magi iwuon, to kawgi kaka mag joot.—1 Timotheo 5:8.

GIK MUNYALO TIMO:

• Winjreuru kuom kwan pesa ma ng’ato nyalo tiyogo ka ok openjo nyawadgi

• Kik urit nyaka sama chandruok moro oneno eka uwuo kuom pesa